كەلەسى اپتادان باستاپ مەكتەپتەردىڭ ءبارى ءداستۇرلى رەجيمدە جۇمىس ىستەيدى. بۇل تۋرالى ق ر پرەمەر-مينيسترىنىڭ ورىنباسارى ەرالى توعجانوۆ ۇكىمەتتىڭ كەڭەيتىلگەن وتىرىسىندا ءمالىم ەتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«وزىڭىزگە بەلگىلى، "وميكرونعا" بايلانىستى ەپيدەميولوگيالىق احۋال كۇرت ناشارلاعان بولاتىن. ءقازىر جاعداي باقىلاۋدا دەپ ايتسام، ارتىق ەمەس. تاۋلىگىنە 16 مىڭنان 2000-عا دەيىن ازايىپ وتىر. سوندىقتان مۇنىڭ ءبارى جالپى جاعدايدىڭ دۇرىستالىپ كەلە جاتقانىنىڭ ناقتى كورىنىسى دەپ ايتۋعا بولادى»، - دەگەن ۆيسە-پرەمەر بيزنەسكە جاعداي جاساۋ ءۇشىن شەكتەۋلەر ءتارتىبى وزگەرتىلىپ جاتقانىن ەسكە سالدى.
«وسىعان بايلانىستى 24 قاڭتاردا ءوزىڭىز بەرگەن بيزنەسكە جاعداي جاساۋ تۋرالى تاپسىرماڭىزعا بايلانىستى ولارعا جول اشۋ ءۇشىن نەگىزگى كارانتين شارالارى الىنىپ تاستالدى. سونىمەن قاتار كەشە عانا قازاقستاندىق جانە شەتەلدىك ازاماتتاردىڭ ەلگە كەلۋىنە بايلانىستى ناقتى شارالار قابىلدانىپ، بارىنشا جەڭىلدىكتەر جاسالىپ جاتىر. كەلەسى دۇيسەنبى، 14 اقپاننان باستاپ بارلىق مەكتەپتەردە وقۋدى وفلاين رەجيمگە اۋىستىرۋدى جوسپارلاپ وتىرمىز»، -دەدى ەرالى توعجانوۆ.