ءار ۇلتتىڭ تەك وزىنە ءتان ۇلتتىق بوياۋىن كورسەتىپ، وزگەدەن ەرەكشەلەپ تۇراتىن – ۇلتتىق ونەرىمەن قاتار، ونىڭ سالت-داستۇرلەرى مەن ادەت-عۇرىپتارى. مىڭداعان جىلدار اتا-بابادان جالعاسىن تاۋىپ، بويىمىزعا ابدەن ءسىڭىپ، كۇندەلىكتى ءومىرىمىزدىڭ اجىراماس بولىگىنە اينالعان سالت-داستۇرلەر مەن ءجون-جورالعىلاردىڭ ءبىر ۇلدىڭ عانا ەمەس، بۇكىل ۇلتتىڭ تاربيەسىندە الار ورنى بولەك. سوندىقتان دا قازاقتا بالانىڭ بويعا بىتكەن كۇنىن بىلگەننەن باستاپ، ول ءومىر ەسىگىن اشىپ، ءوسىپ-ونىپ، جاپىراعىن كەڭگە جايىپ، قارتتىق جاسقا جەتكەنىنە دەيىن جالعاساتىن جورالعىلار مەن ادەت-عۇرىپتاردىڭ ءارقايسىسىنىڭ وزىندىك ءمان-ماعىناسى مەن اتقارار ءرولى ەرەكشە.
تەكتى ۇرپاق تاربيەلەپ، وڭ-سولىن تانىتىپ، ادەپ پەن يبا، سىي مەن قۇرمەت، جاۋاپكەرشىلىك پەن پارىز، ۇلكەننىڭ جولى مەن كىشىلىك ىزەتتى، تۋىستىق قارىم-قاتىناستى، بەرەكە-بىرلىك پەن باۋىرمالدىقتى، اينالاسىنا – ادامدارعا عانا ەمەس، تابيعات، قورشاعان ورتاعا دەگەن قامقورلىقتى بالاسىنىڭ بويىنا جاستايىنان ءسىڭىرىپ وسىرەتىن اتام قازاق قاشان دا «التى جىل اش بولساڭ دا، اتاڭنىڭ سالتىن ۇمىتپا» دەپ، داستۇرىنە بەرىك بولعان. ادەت-عۇرىپ پەن ءجون-جورالعىلار، نانىم-سەنىمگە ەرەكشە كوزقاراسپەن قاراپ، ولاردى تاربيە قۇرالى، ءومىر ءسۇرۋ زاڭدىلىقتارى رەتىندە نەگىزگە العان.
اتا-بابادان مۇرا بولىپ، ۇرپاقتان-ۇرپاققا جەتكەن وسىناۋ سالت-داستۇرلەرىمىز، ادەت-عۇرىپ، نانىم-سەنىمدى جاڭعىرتىپ، جاستارعا تانىتۋ ماقساتىندا الداعى ۋاقىتتا گازەت بەتىندە تۇراقتى تۇردە «اتا سالتى» ايدارىمەن جاريالاپ وتىرۋدى ءجون كوردىك.
ەرتە كەزەڭنەن اق اتا-بابالارىمىز بالا، ۇرپاق تاربيەسىنە كوپ كوڭىل ءبولىپ، ولاردى ۇلكەنگە تاعزىم، كىشىگە ءىلتيپات ەتىپ، باۋىرمالدىققا، مەيىرىمدىلىككە، ىزەتتىلىككە باۋلىعان. «تاربيە – تال بەسىكتەن باستالادى»، «ۇيادا نە كورسەڭ، ۇشقاندا سونى ىلەسىڭ» دەگەن ۇلاعاتتى ءسوزدى جادىنا ابدەن توقىعان. سوندىقتان دا بالانىڭ باۋىرمال، قايىرىمدى ازامات بوپ ەرجەتۋى، الدىمەن، اتا-انانىڭ تاربيەسىنە، قورشاعان ورتانىڭ ۇلگى-ونەگەسىنە بايلانىستى. بالانىڭ العان تاربيەسىنە قاراي «تاربيەلى، ونەگەءلى» ەكەن دەپ تامسانسا، وعاش قىلىق كورسەتكەن بالانى «تاربيەسىز، ونەگەسىز» دەپ سوگەتىن بولعان. قازاقتا ەڭ اۋىر ءسوز – «تاربيەسىز»، «تاربيە كورمەگەن» دەگەن ءسوز. ءارينە، قاي قازاق بالام جامان بولسىن دەسىن، دەمەيدى دە، سوندىقتان دا بەتىمدى جەرگە قاراتپا دەپ وسيەت ءتاربيەسىن ايتىپ وتىراتىنى بەلگىلى.