پوليسيا قىزمەتكەرلەرى مەن ۇلتتىق ۇلان اسكەري قىزمەتشىلەرىنىڭ ۇيلەسىمدى ءىس-قيمىلدارىنىڭ ارقاسىندا تارازدا حابار-وشارسىز كەتكەن ءۇش بالا امان-ەسەن تابىلدى، دەپ حابارلايدى almaty-akshamy.kz ق ر ۇلتتىق ۇلانىنىڭ باسپا ءسوز قىزمەتىنە سىلتەمە جاساپ.
3 شىلدە ساعات 3:30 شاماسىندا ۇلتتىق ۇلاننىڭ 5513 اسكەري ءبولىمىنىڭ كەزەكشىسىنە پوليسيا دەپارتامەنتىنەن ەكى ۇل مەن ءبىر قىز بالانىڭ ۇيدەن شىعىپ، ورالماعانى تۋرالى حابارلاما كەلىپ ءتۇستى. 5 پەن 9 جاس ارالىعىنداعى بالالار تۇستەن كەيىن ۇيدەن شىعىپ كەتكەن. ولارعا باسكوز بولىپ قالعان 14 جاسار اعاسى بۇل ءساتتى بايقاماي قالعان. بەلگىلى بولعانداي، بالالاردىڭ اناسى ولاردى جالعىز باعىپ-قاعادى. ءبىراق ول سول ساتتە اۋرۋحانادا بولعان. ۇلكەن اعاسى ولاردى تۇستەن كەيىن ءوز بەتىنشە ىزدەي باستاعان. تابا الماعان سوڭ پوليسياعا حابار بەرگەن.
ىزدەۋ شارالارىنا 500-گە جۋىق پوليسيا قىزمەتكەرلەرى جانە ۇلتتىق ۇلاننىڭ 100 اسكەري قىزمەتشىسى قاتىستى. ىزدەۋ توپتارىنىڭ ءبىرى "قاراتاۋ" شاعىن اۋدانىندا جوعالعان بالالاردى بايقاعان كۋاگەردەن اقپارات الدى. بەلگىلەنگەن جەردە ەفرەيتور جاندوس ءىلياسوۆ "داك" ەسىمدى قىزمەتتىك يتىمەن ىزدەستىرۋ جۇمىستارىنا اتسالىستى.
- "داك" بىردەن "جانىبەك-كەرەي" ساياباعىنا اپاردى. ساياباقتى ءتىنتۋ كەزىندە ءبىز ورىندىقتاردىڭ بىرىندە ۇيىقتاپ جاتقان بالالاردى تاپتىق. بالالار ۇيدەن تىس جەردە ويناپ ءجۇرىپ، اداسىپ كەتكەن. شارشاعان سوڭ ماڭايداعى ورىندىقتاردىڭ بىرىندە ۇيىقتاپ قالعان. ابىروي بولعاندا، اۋا رايى دا قولايلى بولدى. تابىلعان بالالار وتباسىنا تابىستالدى، - دەدى ىزدەۋ شارالارىنا قاتىسقان ەفرەيتور ج. ءىلياسوۆ.
بالالاردىڭ اناسى، تۋىستارى مەن كورشىلەرى بارلىق پوليسيا قىزمەتكەرلەرى مەن ۇلتتىق ۇلان اسكەري قىزمەتشىلەرىنە سابيلەردى ىزدەۋدە كورسەتكەن كومەگى ءۇشىن العىس ايتتى.