پرەزيدەنت شىۇ-عا مۇشە مەملەكەتتەر باسشىلارى كەڭەسىنىڭ وتىرىسى بارىسىندا ءسوز سويلەپ، ەلدەر اراسىندا ەنەرگەتيكالىق ىنتىماقتاستىقتى نىعايتۋ ماڭىزى جايلى ءسوز قوزعادى، دەپ حابارلايدى Almaty-akshamy.kz.
«بۇگىندە بۇل باعىتتاعى ءوزارا جۇيەلى ىس-ارەكەتتەردى جولعا قويۋدىڭ وزەكتىلىگى ارتىپ كەلەدى. بىزگە ەنەرگەتيكالىق تەپە-تەڭدىكتى قامتاماسىز ەتۋ جۇمىستارىن ۇيلەستىرۋ قاجەت. سونداي-اق ەنەرگەتيكانىڭ جاڭا تۇرلەرىنە كوشۋگە، ەكونوميكا مەن ونەركاسىپتى كومىرتەگىنەن ارىلتۋعا باعىتتالعان كەلىسىمدى ىس-ارەكەتتەر كەرەك. وسىعان بايلانىستى كەلەسى استانا سامميتىنە دەيىن شىۇ-نىڭ ەنەرگەتيكالىق ستراتەگياسىن كەلىسۋدى ۇسىنامىن. بۇل قۇجاتتىڭ قابىلدانۋى ورنىقتى دامۋ سالاسىنداعى بۇۇ كۇن ءتارتىبىنىڭ ماقساتتارىن جۇزەگە اسىرۋعا ىقپال ەتەدى»، دەدى مەملەكەت باسشىسى.
سونىمەن قاتار پرەزيدەنت اتالعان ماسەلەنىڭ اسا ماڭىزدى ەكەنىن ەسكەرە وتىرىپ، قازاقستاندا شىۇ-نىڭ ەنەرگەتيكالىق فورۋمىن وتكىزۋگە دايىن ەكەنىن ايتىپ ءوتتى. قاسىم-جومارت توقايەۆتىڭ ايتۋىنشا، بۇل سالاداعى ىنتىماقتاستىقتىڭ پەرسپەكتيۆالارىن جان-جاقتى تالقىلاۋ شىۇ ەلدەرىنىڭ ەنەرگەتيكالىق قاۋىپسىزدىگى مەن تەڭگەرىمىن قامتاماسىز ەتۋ ءۇشىن بىرلەسكەن ادىستەر ازىرلەۋگە مۇمكىندىك بەرەدى.«وزگە حالىقارالىق ۇيىمداردىڭ تاجىريبەسىنە سۇيەنە وتىرىپ، شىۇ جانىنان تۇراقتى وكىلدەر كەڭەسىن قۇرۋ جانە ولارعا مەملەكەتتەرىمىزدىڭ مۇددەسىن قورعاۋ قۇزىرەتىن بەرۋ ماڭىزدى دەپ سانايمىن. ءوزارا جاۋاپكەرشىلىك پەن تىلەۋلەستىك نەگىزىندە ينكليۋزيۆتى دامۋ مەن جاسامپاز پروگرەسس جولىندا العا قاراي باتىل قادام باسۋىمىز كەرەك. ءتوراعالىق ەتۋ كەزەگىن قابىل الا وتىرىپ، شىۇ كەڭىستىگىندەگى قاۋىپسىزدىك، بەيبىتشىلىك جانە وركەندەۋ ءىسىن ودان ءارى نىعايتا ءتۇسۋ ءۇشىن ۇيىمداعى مارتەبەسىنە قاراماستان بارلىق ەلمەن اراداعى بەلسەندى جانە تابىستى جۇمىستى جالعاستىرامىز. وسى ورايدا بارشاڭىزدى شانحاي ىنتىماقتاستىق ۇيىمىنىڭ قازاقستان ەلورداسى – استانادا وتەتىن كەلەسى سامميتىنە قاتىسۋعا شاقىرامىن»، دەپ تۇيىندەدى مەملەكەت باسشىسى.