قابىلدانعان شارالاردىڭ ناتيجەسىندە ىزدەۋدە جۇرگەن تۇلعا ۇستالدى.
باس پروكۋراتۋرا تاراتقان اقپاراتقا سۇيەنسەك، كۇدىكتى قىلمىس جاساعاننان كەيىن قىلمىستىق قۋدالاۋ ورگانىنان بوي تاسالاعان، سوندىقتان وعان حالىقارالىق ىزدەۋ جاريالانعان، دەپ حابارلايدى Almaty-akshamy.kz
گرۋزيانىڭ ادىلەت مينيسترلىگى لاۋازىمدىق قۇزىرەتىن اسىرا پايدالانعانى جانە 50 ملن تەڭگەدەن استام بيۋدجەت قاراجاتىن ىسىراپ قىلعانى ءۇشىن كۇدىكتى دەپ تانىلعان تاراز قالاسى اكىمىنىڭ بۇرىنعى ورىنباسارىن ۇستاپ بەرۋ تۋرالى ق ر باس پروكۋراتۋراسىنىڭ سۇراۋىن قاناعاتتاندىردى.
"گرۋزيالىق ارىپتەستەرمەن اراداعى تىعىز قارىم-قاتىناستىڭ ناتيجەسىندە بۇگىن باس پروكۋراتۋرا، سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى قازاقستان رەسپۋبليكاسى سىرتقى ىستەر مينيسترلىگىنىڭ كومەگىمەن كۇدىكتىنى قىلمىستىق جاۋاپقا تارتۋ ءۇشىن قازاقستانعان اكەلدى" دەلىنگەن ق ر باس پروكۋراتۋراسىنىڭ باسپا ءسوز قىزمەتى تاراتقان اقپاراتتا.
ول استانا قالاسىنىڭ تەرگەۋ يزولياتورىنا قامالدى.
جوعارىدا كورسەتىلگەن قىلمىستاردى جاساعانى ءۇشىن وعان 12 جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن.
حالىقارالىق ىزدەۋدە جۇرگەن تاراز قالاسى اكىمىنىڭ بۇرىنعى ورىنباسارى قايسار سارىتاي گرۋزيادان ەكستراديسيالاناتىنى 2021 جىلدىڭ جەلتوقسانىندا بەلگىلى بولدى. كەيىن ق ر سىبايلاس جەمقورلىققا قارسى ءىس-قيمىل اگەنتتىگى ونىڭ گرۋزيا اۋماعىندا ۇستالىپ، قاماۋعا الىنعانىن حابارلادى.