الماتىلىق انا بالاسىن امان الىپ قالعانى ءۇشىن بالالار جەدەل جاردەم دارىگەرلەرىنە العىسىن ءبىلدىردى، دەپ حابارلايدى Almaty-akshamy.kz
10 جاسار داستان تاۋشىمىلدىق (پيون) سپيرتتىك تۇنباسىن سۋمەن شاتاستىرىپ ءىشىپ قويعان. ءبىراز ۋاقىتتان كەيىن بالانىڭ دەنساۋلىعى ناشارلاپ، ەسىنەن تانىپ قالعان. جەدەل جاردەم بريگاداسى ناۋقاستى الماتى بالالار جەدەل مەديسينالىق جاردەم ورتالىعىنا جەتكىزدى. بالانىڭ جاقىندارى ونىڭ سول تۇنبانى ىشكەنىن بىلمەگەندىكتەن، بالا تاعامنان ۋلانعان دەپ بولجاپ، ناقتى دياگنوز قويۋ قيىنعا سوققان. داستان بۇرىن ەشقاشان دارى-دارمەك پەن تاعام اللەرگياسىنان زارداپ شەكپەگەن.
«بىزگە بالا III دارەجەلى ەكزوۋىتتى شوك سالدارىنان وتە اۋىر جاعدايدا ءتۇستى، بالادا قانداعى گليۋكوزانىڭ جوعارىلاۋى (18 ممول/ل دەيىن)، گيپەرگليكەميا، كەتواسيدوز، باس مي ءىسىنۋى، جالپى ينتوكسيكاسيا بەلگىلەرى بايقالدى. ساناسى كومادا بولدى. قابىلداۋ ءبولىمىنىڭ جاعدايىندا ناۋقاستى كوپبەيىندى دارىگەرلەر بريگاداسى تەكسەرىپ، شۇعىل تۇردە كلينيكالىق جانە زەرتحانالىق زەرتتەۋلەر جۇرگىزىلدى. تاۋشىمىلدىق تۇنباسىمەن جەدەل ۋلانۋ. اۋىر دارەجە. 3-دارەجەلى ەكزوۋىتتى شوك. ۋىتتى ەنسەفالوپاتيا. ۋىتتى گەپاتيت. ناۋقاس جانساقتاۋ بولىمىنە جاتقىزىلدى، وندا وعان جەكە دارىگەرلىك جانە مەدبيكەلىك پوست تاعايىندالدى. جاعدايىنىڭ اۋىرلىعىنا بايلانىستى ناۋقاستىڭ جۇرەگى ەكى رەت توقتاپ قالعان. رقتب قىزمەتكەرلەرى بالانى رەانيماسيالاپ، جاعدايىن تۇراقتاندىرۋعا قول جەتكىزدى»، - *دەيدى الماتى بالالار جادەل مەديسينالىق جاردەم ورتالىعىنىڭ توكسيكولوگيا ءبولىمىنىڭ مەڭگەرۋشىسى حۋرمەتبەك توحتار*.
10 كۇننىڭ ىشىندە بالالار جەدەل جاردەم دارىگەرلەرى بالانى ومىرگە قايتارىپ الدى. ۋلانۋ بەلگىلەرى توقتاپ، بالانىڭ اعزاسى قالپىنا كەلدى.
«10-بولىمشەنىڭ مەديسينا قىزمەتكەرلەرىنە، اسىرەسە حۋرمەتبەك توحتارۇلىنا، سونىمەن قاتار جانساقتاۋ بولىمشەسىنىڭ قىزمەتكەرلەرىنە، اسىرەسە م.گ. ماقۇلبەكوۆ، ت.م. بيدايباي، ا.ز. ريگي، ا. كۋليمبەتوۆ، نيەۆروپاتولوگ ن.ن. قۇرمانبايەۆقا ۇلىم ءۇشىن العىس بىلدىرەمىن! جانكەشتى ەڭبەكتىڭ، جوعارى كاسىبيلىكتىڭ، قايىرىمدىلىقتىڭ، ساپالى مەديسينالىق كومەك كورسەتۋگە دەگەن ۇمتىلىستىڭ ارقاسىندا ۇلىم امان قالدى. جۇرەگى ەكى رەت توقتاپ قالدى، ءبىر تاۋلىكتەن استام ۋاقىت كومادا بولدى، جاساندى تىنىس الۋ اپپاراتىنا قوسىلدى. مىنە، ەندى ءبىز ەش پاتولوگياسىز دەرلىك ۇيگە شىققالى جاتىرمىز، دەنساۋلىعىمىز جاقسى، بارلىق اناليزدەر جاقسى ناتيجە بەردى. كاسىبي مامانداردى تاڭداپ، جۇمىستى جاقسى ۇيىمداستىرعانى بالالار جەدەل مەديسينالىق جاردەم ورتالىعىنىڭ بۇكىل ۇجىمىنا كوپ راحمەت»، - *دەپ داستاننىڭ اناسى ورتالىق دارىگەرلەرىنە شىن جۇرەكتەن العىسىن جاۋدىردى*.
دارىگەرلەر ازىق-تۇلىك قاۋىپسىزدىگى شارالارىن قاتاڭ ساقتاۋدى، دارى-دارمەك پەن بالا دەنساۋلىعىنا ءقاۋىپتى زاتتاردى ولاردىڭ قولى جەتپەيتىن جەردە ساقتاۋدى سۇرايدى. جاز – كونسەرۆى مەن مارينادتى دايىنداۋ ماۋسىمى، بۇل كەزدە سىركە سۋى جانە باسقا ءقاۋىپتى زاتتارمەن ۋلانۋ ىقتيمالدىعى ايتارلىقتاي ارتا تۇسەدى. دارىگەرلەر اتا-انالاردان ازىق-تۇلىكتى ساقتاۋدا ساق بولۋدى سۇرايدى.