تانىمال ءانشى قازاقستان اۆتورلىق قوعامىن سىنعا الدى

ءانشى ايقىن تولەپبەرگەن "قازاقستان اۆتورلىق قوعامىنىڭ" (قازاق) ارتىستەردىڭ شىعارماشىلىعى ارقىلى مول تابىس تاۋىپ، ءبىراق وزدەرىنە ۇلەس بەرمەيتىنىن اشىق ايتتى، دەپ حابارلايدى aqshamnews.kz

وتكەن ايدان باستاپ Instagram الەۋمەتتىك جەلىسىندە قازاقستاندىق ارتىستەردىڭ اندەرىن پايدالانۋ شەكتەلدى. بۇل Meta كومپانياسى مەن قازاق اراسىنداعى ىنتىماقتاستىقتىڭ توقتاۋىنا بايلانىستى بولدى.

ايقىن تولەپبەرگەن كانات بەيسەقەيەۆكە بەرگەن سۇحباتىندا قازاق جۇمىسىنىڭ اشىق ەمەستىگىن سىنعا الدى:

"قازاقستان اۆتورلىق قوعامى ميللياردتاعان تەڭگەنى جيناعانىمەن، ارتىستەر ءوز ۇلەسىن كورمەيدى. ءتىپتى كاراوكە-بارلار ۇلكەن سومالار تولەيدى، ءبىراق بۇل اقشانىڭ قايدا كەتەتىنى بەيمالىم."

ءانشىنىڭ ايتۋىنشا، باتىس ەلدەرىندە ارتىستەر تۇراقتى سىياقى السا، قازاقستاندا جاعداي مۇلدە باسقاشا.

"بۇلار Instagram-دى قۇرتۋعا دەيىن جەتتى، تەك وزدەرى كوبىرەك تابىس تاۋىپ، بىزگە ەشتەڭە بەرمەۋ ءۇشىن. ولاردىڭ ەسەپشوتىندا ميللياردتاعان تەڭگە جاتىر. مىسالى، مەنىڭ دوسىمنىڭ كاراوكەسى بار، ول اي سايىن 500 مىڭ تەڭگە تولەۋى كەرەك. ءبىراق كەرەكتى اداممەن كەلىسىپ، قولما-قول 200 مىڭ بەرىپ قۇتىلادى. ارينە، بارلىعىن بىردەي كىنالاي المايمىن، ءبىراق استىرتىن ماسەلەلەر وتە كوپ"، – دەدى ايقىن.