مەملەكەت باسشىسى اتىراۋدا وتكەن III ۇلتتىق قۇرىلتايدا: «شىن مانىندە، وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك»،- دەگەن ەدى.
Quryltai.kz دەرەگىنشە، پرەزيدەنت تاپسىرماسىنا سايكەس، بيىل العاش رەت 23 ءساۋىر – ۇلتتىق كىتاپ كۇنى بولىپ اتاپ ءوتىلدى. وسى مەرەكەدە قازاق ادەبيەتىن كەڭىنەن ناسيحاتتاۋدى كوزدەيتىن جاڭا جوبا – «100 كىتاپ» ساۋالناماسى باستالىپ، اباي كۇنى قارسانىندا اياقتالدى. ساۋالناما ەGov.kz پورتالىندا جۇرگىزىلدى.
.jpg)
بۇگىن جوبانىڭ قورىتىندى ءىس-شاراسى ءوتىپ، وعان قوعام قايراتكەرلەرى مەن زيالى قاۋىم وكىلدەرى قاتىستى. جينالعاندار بۇل باستامانىڭ ەل رۋحانياتى ءۇشىن ايرىقشا ماڭىزدى قادام بولعانىن اتاپ ءوتتى.
3 ايعا سوزىلعان ساۋالناماعا 100 مىڭنان استام ادام قاتىسىپ، ءوز تاڭداۋىن جاسادى. باستاماعا بەلگىلى قالامگەرلەر مەن ساراپشىلار دا اتسالىسىپ، داۋىس بەردى.
جيىنعا قاتىسقانداردىڭ پىكىرى بويىنشا، بۇل جوبا قازاق ادەبيەتىن ناسيحاتتاۋعا ىقپال ەتىپ قانا قويماي، كىتاپ وندىرىسىنە دە، كىتاپحانا ىسىنە دە سونى سەرپىن بەرەدى.
قورىتىندى تىزىمگە كلاسسيكالىق شىعارمالاردان باستاپ، قازىرگى زامان اۆتورلارىنىڭ دا تۋىندىلارى ەندى. ءتىزىم قۇرامىنا كوركەم ادەبي رومان مەن پوۆەستەر، ولەڭ جيناقتارى كىردى.
تولىق ءتىزىم ۇلتتىق قۇرىلتايدىڭ رەسمي سايتىندا جاريالاندى. بۇل جوبا ەندى تۇراقتى تۇردە جالعاسىپ، ءتىزىم جاڭارتىلىپ وتىرادى.
«100 كىتاپ» جوباسى – ۇلتىمىزدىڭ بولمىسىن ايشىقتايتىن، قالىڭ وقىرماننىڭ ادەبي تالعامىن قالىپتاستىراتىن، كەلەر ۇرپاققا رۋحاني باعىت-باعدار بولاتىن ماڭىزدى قادام.
