بيىلعى 7 ايدا قازاقستاننىڭ ءجىو ءوسىمى 6،3% بولدى

 ۇلتتىق ستاتيستيكا بيۋروسىنىڭ الدىن الا دەرەكتەرىنە سايكەس، 2025 جىلدىڭ قاڭتار–شىلدە ايلارىندا قازاقستاننىڭ جالپى ىشكى ءونىمى (ءجىو) بىلتىرعى سايكەس كەزەڭمەن سالىستىرعاندا 6،3%-عا وسكەن.

تاۋار ءوندىرۋ كولەمى 8،3%-عا، قىزمەتتەر 5،2%-عا (بۇل رەتتە ەڭ قارقىندى سەگمەنت كولىك پەن ساۋدا بولىپ وتىر)، ونەركاسىپ 6،9%-عا ارتتى.
ءجىو-نىڭ وسۋىنە ەڭ كوپ ۇلەس قوسقان سالالار: كولىك جانە قويما – 22،5%، قۇرىلىس – 18،5%، كوتەرمە جانە بولشەك ساۋدا – 8،6%، تاۋ-كەن ونەركاسىبى – 8،5%، وڭدەۋ ونەركاسىبى – 6،1%.

كولىك جانە قويما سالاسىنداعى قىزمەت كولەمى تەمىرجول، قۇبىر جەلىلەرى جانە اۆتوموبيل كولىگىمەن جۇك تاسىمالى كولەمىنىڭ جوعارى بولۋىنا بايلانىستى 22،5%-عا ءوستى.

قۇرىلىس سالاسىندا جۇمىس كولەمى 18،5%-عا ارتتى (2025 جىلدىڭ قاڭتار–ماۋسىمىنداعى 18،4%-بەن سالىستىرعاندا). تۇركىستان وبلىسىندا (+34،6%) مەكتەپتەر، تەمىرجول جەلىلەرى جانە اۆتوجولدار قۇرىلىسى، اقتوبە وبلىسىندا (+25،6%) جايلى مەكتەپتەر قۇرىلىسى مەن جولداردى رەكونسترۋكسيالاۋ، جامبىل وبلىسىندا (+13،1%) جانە شىعىس قازاقستان وبلىسىندا (+5،9%) تۇرعىن ۇيلەر، مەديسينالىق نىساندار جانە ەلەكتر جەلىلەرىن سالۋ جوبالارىن جۇزەگە اسىرۋعا بايلانىستى جوعارى ءوسىم تىركەلىپ وتىر.

ساۋدا 8،6%-عا ءوستى (2025 جىلدىڭ قاڭتار–ماۋسىمىندا 8،4%). ەسەپتى كەزەڭدە كوتەرمە ساۋدا 9،5%-عا ءوسىپ، جالپى ءوسىمنىڭ 66%-دان استامىن قامتىدى، بولشەك ساۋدا 6،6%-عا ارتتى. ايتارلىقتاي ديناميكا قوستاناي وبلىسىندا (+17،6%)، سولتۇستىك قازاقستان وبلىسىندا (+12%) جانە استانادا (+9،2%) بايقالدى، مۇندا استىق، اگروحيميا، ازىق-تۇلىك، وتىن، فارماسيەۆتيكا ونىمدەرىن جانە تەحنيكا ساتۋ كورسەتكىشتەرى قارقىندى تۇردە ءوسىپ كەلەدى.

ونەركاسىپ وندىرىسىندەگى ءوسىم – 6،9%. ەلىمىزدىڭ بارلىق وڭىرىندە ءوسىم بايقالدى، ءبىراق ديناميكا بويىنشا كوشباسشىلار – جامبىل وبلىسى (+18،2%)، سولتۇستىك قازاقستان وبلىسى (+14،9%)، شىمكەنت (+15،8%) جانە الماتى (+13،5%)، سونداي-اق تۇركىستان وبلىسى (+12،3%).

وڭدەۋ ونەركاسىبىندەگى ءوسىمدى (6،1%) ماشينا جاساۋ (+14%)، ازىق-تۇلىك (+9،2%)، مۇناي ونىمدەرى (+8،6%)، حيميا ونەركاسىبى (+6%) جانە مەتاللۋرگيا (+1،3%) كورسەتىپ وتىر.

اۋىل، ورمان جانە بالىق شارۋاشىلىقتارىنداعىءوندىرىس كولەمى 3،7% دەڭگەيىندە ساقتالدى. مال شارۋاشىلىعىنداعى ءوسىم ءسۇت (+6،1%)، مال، قۇس بورداقىلاۋ (+2،1%) جانە جۇمىرتقا (+0،9%) ەسەبىنەن 3،4%-عا جەتتى.
ۇكىمەت ەكونوميكاداعى نەگىزگى سالالاردى قولداۋعا، ونى ءارتاراپتاندىرۋعا جانە ينۆەستيسيالىق بەلسەندىلىكتى ىنتالاندىرۋعا ەرەكشە نازار اۋدارا وتىرىپ، ەكونوميكانىڭ تۇراقتى ءوسىمىن قامتاماسىز ەتۋ جونىندەگى پرەزيدەنتتىڭ تاپسىرمالارىن جۇزەگە اسىرۋ بارىسىن باقىلاۋدا ۇستاپ وتىر.