كونفەرەنسياعا ءازىربايجان، تۇركيا جانە قازاقستاننىڭ ارحەولوگ عالىمدارى قاتىستى
قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي «تاڭبالى» مەملەكەتتىك تاريحي – مادەني جانە تابيعي قورىق مۋزەيىنىڭ ساپار ورتالىعىندا «قازاقستاننىڭ تاريحي-مادەني مۇراسى: زەردەلەۋ، ءتۇسىندىرۋ جانە ساقتاۋ ماسەلەلەرى» اتتى حالىقارالىق عىلىمي – تاجىريبەلىك كونفەرەنسياسى ءوتتى، دەپ حابارلايدى Almaty-akshamy.kz.
كونفەرەنسياعا ءازىربايجان، تۇركيا جانە قازاقستاننىڭ بەلگىلى ارحەولوگ عالىمدارى قاتىسىپ، جارتاس ونەرىن ساقتاۋ مەن كونسەرۆاسيالاۋ تاقىرىبىنداعى قۇندى پىكىرلەرىن ورتاعا سالدى.
جيىندا قازاقستان رەسپۋبليكاسىنىڭ ەڭبەك سىڭىرگەن قايراتكەرى، جالپى ۇلتتىق تاۋەلسىز «پلاتينالى تارلان» سىيلىعىنىڭ يەگەرى، گەرمان ارحەولوگيا ينستيتۋتىنىڭ كوررەسپوندەنت مۇشەسى زەينوللا ساماشيەۆ، تاريح عىلىمدارىنىڭ دوكتورى، پروفەسسور، بەلگىلى ارحەولوگ ج.تايماعانبەتوۆ، قازاقستان رەسپۋبليكاسىنىڭ ەڭبەك سىڭىرگەن قايراتكەرى، قازاقستان رەسپۋبليكاسى سۋرەتشىلەر وداعىنىڭ مۇشەسى، سۋرەتشى-قالپىنا كەلتىرۋشى، «وستروۆ-كرىم» عىلىمي –زەرتتەۋ زەرتحاناسىنىڭ باسشىسى قىرىمبەك التىنبەكوۆ، انكارا قالاسىنداعى قاجى بايرام ۆەلي ۋنيۆەرسيتەتى، ارحەولوگيا ءبولىمىنىڭ رhd دوسەنتى اتاكان اكچاي، اتالعان ۋنيۆەرسيتەتتىڭ تۇركى فولكلورى ءبولىمىنىڭ رhd دوسەنتى ەۆريم ولچەر، گوبۋستان مەملەكەتتىك تاريحي - كوركەم قورىق مۇراجايىنىڭ ديرەكتورى ۆۋگار يسايەۆ، ءال-فارابي اتىنداعى قازاق ۇلتتىق ۋنيۆەرسيتەتىنىڭ تاريح، ارحەولوگيا جانە ەتنولوگيا فاكۋلتەتىنىڭ دەكانى، تاريح عىلىمدارىنىڭ كانديداتى، دوسەنت م.نوعايبايەۆا جانە ءال-فارابي اتىنداعى قازاق ۇلتتىق ۋنيۆەرسيتەتىنىڭ تاريح، ارحەولوگيا جانە ەتنولوگيا فاكۋلتەتىنىڭ پروفەسسورى، تاريح عىلىمدارىنىڭ دوكتورى م.ەلەۋوۆ سىندى تانىمال عالىمدار بايانداما جاسادى.
كونفەرەنسيا بارىسىندا گوبۋستان مەملەكەتتىك تاريحي - كوركەم قورىق مۇراجايى مەن «تاڭبالى» مەملەكەتتىك تاريحي- مادەني جانە تابيعي قورىق- مۋزەيى اراسىنداعى ىنتىماقتاستىق قارىم- قاتىناس پەن تاجىريبە الماسۋ ماقساتىندا ەكى جاقتى مەموراندۋمعا قول قويىلدى.
«تاڭبالى» مەملەكەتتىك تاريحي- مادەني جانە تابيعي قورىق-مۋزەيىنىڭ ديرەكتورى ماديار امىرعالييەۆ كەلگەن قوناقتاردى تاڭبالى شاتقالىنا باستاپ بارىپ، جارتاسىنداعى سۋرەتتەردى كورسەتتى. شەتەلدەن كەلگەن قوناقتار «تاڭبالىنىڭ» تىلسىم سۋرەتتەرىن تاماشالاپ، مۇندا اتقارىلىپ جاتقان جۇمىستارعا جوعارى باعا بەردى.