بۇل ۇبت شەكتى بالل جيناي الماعان تالاپكەرلەردىڭ وقۋ ورنىنا اقىلى نەگىزدە تۇسۋگە مۇمكىندىك بەرۋ ءۇشىن وتكىزىلەدى.
ق ر عىلىم جانە جوعارى ءبىلىم مينيسترلىگىنىڭ مالىمدەۋىنشە، تامىز ايىندا وتەتىن ۇلتتىق ءبىرىڭعاي تەستىلەۋ باستالدى، دەپ حابارلايدى Almaty-akshamy.kz
ۆەدومستۆونىڭ اقپاراتىنا سايكەس، وعان قاتىسۋعا 20 مىڭنان استام ءوتىنىش قابىلداندى.
تىركەۋ جۇمىستارى عىلىم جانە جوعارى ءبىلىم مينيسترلىگىنە قاراستى ۇلتتىق تەستىلەۋ ورتالىعىنىڭ app.testcenter.kz سايتىندا 25-30 شىلدە ارالىعىندا جۇرگىزىلدى.
تامىزداعى ۇبت شەكتى بالل جيناي الماعان تالاپكەرلەردىڭ تەستىلەۋدەن قايتا ءوتىپ، جوعارى وقۋ ورنىنا اقىلى نەگىزدە تۇسۋگە مۇمكىندىك بەرۋ ءۇشىن وتكىزىلەدى.
ەستەرىڭىزگە سالا كەتسەك، وسى ۇبت-عا بيىلعى جانە وتكەن جىلداردىڭ مەكتەپ تۇلەكتەرى، كوللەدج تۇلەكتەرى مەن شەتەلدىك مەكتەپتەردە ءبىلىم العاندار قاتىسا الادى. نەگىزگى ۇبت سەكىلدى تامىزداعى تەستىلەۋ ەلەكتروندى فورماتتا 10-13 تامىز ارالىعىندا وتەدى. تىركەلۋ كەزىندە تەستىلەۋگە قاتىسۋشىلار ەمتيحان وتكىزىلەتىن ورىندى، كۇندى جانە ۋاقىتتى وزدەرى تاڭدادى.
«شەكتى بالل جيناي الماعان تالاپكەرلەردىڭ اقىلى بولىمگە ءتۇسۋ مۇمكىندىگى بولۋى ءۇشىن تامىز ايىندا قايتا تەستىلەۋدەن وتۋگە جاعداي جاسادىق. وقۋعا ءتۇسۋ ءۇشىن شەكتىك بالل جانە ءار پاننەن كەمىندە 5 بالل جيناۋ قاجەت. نەگىزگى ۇبت-عا قاتىسقان تالاپكەرلەر بەيىندىك پاندەر كومبيناسياسىن تامىز تەستىلەۋىندە وزگەرتىپ، تەستىلەۋگە قاتىسا الاتىندىعىن ايتا كەتكەن ءجون»، – دەدى ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
سونىمەن قاتار جوعارى وقۋ ورنىنا اقىلى نەگىزدە ءوز ماماندىعى بويىنشا وقۋدى جالعاستىرۋدى جوسپارلاپ وتىرعان كوللەدج تۇلەكتەرى وقۋعا اڭگىمەلەسۋ قورىتىندىسى بويىنشا قابىلدانادى.