تامىرى تەرەڭ، بولاشاعى جارقىن وقۋ ورنى

ۇلتتىق تالىم-تاربيە مەن ءبىلىم قۇندىلىقتارىن بويىنا ءسىڭىرىپ، كاسىبي ماماندار دايارلاۋدا باي تاجىريبە جيناقتاعان، بۇرىنعى كينوتەحنيكۋمنىڭ زاڭدى مۇراگەرى — قازىرگى Almaty Polytechnic College. بۇگىندە بۇل وقۋ ورنى 85 جىلدىق داڭقتى جولىن ارتقا تاستاپ وتىر.

1940 جىلى قىركۇيەكتە كسرو حالىق كوميسسارلارى كەڭەسى جانىنداعى كينەماتوگرافيا ىستەرى كوميتەتىنىڭ ءتوراعاسى 1940 جىلعى 11 قىركۇيەكتەگى №405 بۇيرىققا قول قويىپ، وقۋ ورنىنىڭ نەگىزى قالاندى. 1941 جىلى ۇلى وتان سوعىسىنىڭ قيىن-قىستاۋ كەزەڭىندە بەلورۋسسياداعى ۆيتەبسك كينوتەحنيكۋمى الماتىعا ەۆاكۋاسيالاندى. بۇل تاريحي شەشىم قازاق جەرىندە جاڭا وقۋ ورنىنىڭ تامىرىن تەرەڭدەتىپ، ءبىلىم سالاسىنا تىڭ سەرپىن بەردى. ەۆاكۋاسيالانعان وقىتۋشىلار مەن ستۋدەنتتەر الماتىلىق ارىپتەستەرىمەن بىرلەسىپ جۇمىس ىستەپ، وقۋ ساپاسىن ارتتىرىپ، كادرلار دايارلاۋ ءىسىن جالعاستىردى. لەنينگراد پەن زاگورسك كينوتەحنيكۋمدارىنىڭ قولداۋى دا ەرەكشە بولدى.

1940 جىلدارى الماتى كينوتەحنيكۋمى وداق اۋماعىنداعى شىعىس وڭىرلەر مەن ورتا ازيادا كينو سالاسىنا مامان دايىندايتىن جالعىز وقۋ ورنى بولدى. سوعىس جىلدارىندا دا، ودان كەيىنگى كەزەڭدە دە بۇل مارتەبەلى مىندەتتى ۇزدىكسىز اتقاردى.

كوللەدج تاريحىندا كوپتەگەن باسشىلاردىڭ ەسىمدەرى التىن ارىپتەرمەن جازىلدى: ل.ك. شاكالا، ج.ا. ءالىمجانوۆ، ا.ا. جۋك، ي.يا. چۋدنوۆسكيي، ۆ.ۆ. يۆانوۆسكايا، گ.ا. يۆانوۆ، و.ۆ. پاۆلوۆسكيي، ۆ.ا. سەيپۋلنيك، ل.ا. دەرنوۆا-سەمەنيۋك، ل.ف. دميترييەۆ، پ.پ. ۆوزوۆيكوۆ، ج.ت. تۋركپەنوۆ، ح.ح. سانبايەۆ، س.ي. نۇسىپبەكوۆ، ن.ج. جابىقبايەۆ. قازىرگى تاڭدا وقۋ ورنىنا مەدەت اسەت ۇلى وماربەكوۆ باسشىلىق ەتۋدە.

1990 جىلدارى ق ر مينيسترلەر كابينەتىنىڭ قاۋلىسىمەن كينوتەحنيكۋم مەن ماشينا جاساۋ تەحنيكۋمى قازاق ۇلتتىق تەحنيكالىق ۋنيۆەرسيتەتىنىڭ قۇرامىنا بىرىكتىرىلدى. 1997 جىلى ق ر ءبىلىم، مادەنيەت جانە دەنساۋلىق ساقتاۋ ءمينيسترىنىڭ №200 بۇيرىعىمەن وقۋ ورنىنا «الماتى پوليتەحنيكالىق كوللەدجى» اتاۋى بەرىلدى. كوللەدجدىڭ دامۋىنا زور ۇلەس قوسقان تۇلعالاردىڭ ءبىرى — سەرىك يمانسەرىك ۇلى نۇسىپبەكوۆ.

بۇگىنگى تاڭدا Almaty Polytechnic College – تەحنيكالىق جانە كاسىپتىك ءبىلىم بەرۋ سالاسىنداعى كوشباسشى وقۋ ورىندارىنىڭ ءبىرى. كوللەدج تۇلەكتەرى ءتۇرلى سالادا تابىستى ەڭبەك ەتۋدە. ولاردىڭ قاتارىندا:

• ت.تايتۋلەيەۆ – الماتى مەملەكەتتىك ەنەرگەتيكا جانە ەلەكتروندى تەحنولوگيالار كوللەدجىنىڭ ديرەكتورى

• ب.بوزىمبايەۆ – الماتى ەلەكترومەحانيكالىق كوللەدجىنىڭ ديرەكتورى

• س.سۇلەيمەنوۆ – الماتى جولاۋشىلار كولىگى جانە تەحنولوگيالار كوللەدجىنىڭ ديرەكتورى

• ە.ماگازوۆ – الماتى مەملەكەتتىك كولىك جانە كوممۋنيكاسيا كوللەدجىنىڭ ديرەكتورى

• ا. بەيسەتبايەۆ – الماتى كوپسالالى كوللەدجىنىڭ ديرەكتورى

• ق.ياكەنوۆا – UIB كوپسالالى كوللەدجىنىڭ ديرەكتورى

كوللەدجدە كەلەسى باعىتتار بويىنشا ءبىلىم بەرىلەدى:

• «باعدارلامالىق قامتاماسىز ەتۋ»

• «ەسەپتەۋ تەحنيكاسى جانە اقپاراتتىق جەلىلەر»

• «اقپاراتتىق قاۋىپسىزدىك جۇيەلەرى»

• «راديوتەحنيكا، ەلەكترونيكا جانە تەلەكوممۋنيكاسيالار»

• «ماشينالار مەن جابدىقتاردى پايدالانۋ»

تۇلەكتەر اراسىندا ەلىمىزگە تانىمال ماماندار جەتەرلىك. اتاپ ايتقاندا، حودورەنكو ولەگ يۋريەۆيچ – «مەتاكو» ج ش س ديرەكتورى، اكيموۆ شىڭعىس – «قازاقستان» تەلەراديوكورپوراسياسىنىڭ تەحنيكالىق ديرەكتورى، جانات ءومىرالى – قويۋشى-وپەراتور، تۋرماتوۆ باۋىرجان – «BAUNER» جانە «FALCON-1» كومپانيالارىنىڭ نەگىزىن قالاۋشى.

كوللەدج زاماناۋي زەرتحانالارمەن، IT-hub جانە قۇزىرەتتەر ورتالىعىمەن جابدىقتالعان. بۇل ورتالىقتاردا ستۋدەنتتەر باعدارلامالاۋ، گرافيكالىق ديزاين جانە دەرەكتەرمەن جۇمىس ىستەۋ باعىتىندا تاجىريبە جيناقتايدى.

الماتى قالاسىنىڭ 2023–2030 جىلدارعا ارنالعان ءبىلىمدى دامىتۋ جول كارتاسى اياسىندا وقىتۋشىلار جۇڭگو، كورەيا، مالايزيا ەلدەرىندە تاعىلىمدامادان ءوتتى. بۇل – كوللەدجدى حالىقارالىق ستاندارتتارعا ساي جاڭعىرتۋ جولىنداعى ماڭىزدى قادام.

Almaty Polytechnic College — ۇزدىكسىز دامىپ كەلە جاتقان وقۋ ورنى. كوللەدج ستۋدەنتتەرى WorldSkills چەمپيوناتتارى مەن «قازاقستان كوللەدجدەرىنىڭ توپ-100 ستۋدەنتى» بايقاۋىندا جۇلدەلى ورىنداردى يەلەنىپ ءجۇر. 2024 جىلى "KIROSHI" روبوتوتەحنيكا كومانداسى نيدەرلاندىدا وتكەن First Tech Challenge حالىقارالىق چەمپيوناتىندا جەڭىسكە جەتىپ، 2025 جىلى اقش-تا وتەتىن Premier Event Michiana جارىسىنا جولداما الدى.

كوللەدجدە «Polytech eriktileri»، «جاس قىران»، «Sanaly urpag» سەكىلدى ۇيىمدار مەن «قىز – ەلدىڭ كوركى»، «Polytech ziatkerleri»، «تىلدەر الەمى» جوبالارى ءساتتى جۇمىس ىستەيدى. بۇل ۇيىمدار جاستاردىڭ ازاماتتىق بەلسەندىلىگى مەن رۋحاني دامۋىنا ۇلەس قوسىپ كەلەدى.

Almaty Polytechnic College – ۇلتتىق قۇندىلىقتار مەن زاماناۋي ءبىلىمدى ۇشتاستىرا وتىرىپ، بولاشاققا سەنىممەن قادام باسىپ كەلە جاتقان وقۋ ورنى.

وماربەكوۆ مەدەت اسەت ۇلى، كوللەدج ديرەكتورى