XII حالىقارالىق تۇركى الەمى زەرتتەۋلەرى سيمپوزيۋمىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما تءوراعاسى – رەكتورى، پروفەسسور گۇلميرا قاناي «تۇركى ايەلدەرى ەنسيكلوپەدياسىن» جازۋدى ۇسىندى، دەپ حابارلايدى aqshamnews.kz.
نييدە ومەر حاليسدەمير ۋنيۆەرسيتەتىندە وتكەن سيمپوزيۋم اياسىندا تۇركى الەمىنىڭ وزەكتى ماسەلەلەرىن قامتيتىن بىرنەشە عىلىمي سەكسيالار ۇيىمداستىرىلىپ، وندا تۇركيا، قازاقستان، ازەربايجان، وزبەكستان، قىرعىزستان، تۇرىكمەنستان جانە باسقا دا ەلدەردىڭ جوعارى وقۋ ورىندارى مەن عىلىمي-زەرتتەۋ مەكەمەلەرىنىڭ عالىمدارى، زەرتتەۋشىلەرى ءوز باياندامالارىن ۇسىندى. تۇركى مەملەكەتتەرى اراسىنداعى جوعارى ءبىلىم سالاسىنداعى ىنتىماقتاستىقتى باستى تاقىرىپ ەتكەن حالىقارالىق جيىنعا قازاق ۇلتتىق قىزدار پەداگوگيكالىق ۋنيۆەرسيتەتى رەسمي سەرىكتەس رەتىندە قاتىسۋدا.
QyzPU رەكتورى گۇلميرا قاناي ءوز سوزىندە تۇركى حالىقتارىنىڭ ورتاق تامىرى مەن مادەني مۇراسى، سونىڭ ىشىندە ايەلدەردىڭ ءبىلىم مەن عىلىمعا قوسقان ۇلەسىن زەرتتەپ، كەلەشەك ۇرپاققا جەتكىزۋدىڭ ماڭىزدىلىعىنا توقتالدى.
رەكتور تۇركى ەلدەرىندەگى قىز بالانىڭ ءبىلىم الۋ تاريحىنا ارنالعان وقۋلىق جازۋ جانە ايەل عالىمدار مەن اعارتۋشىلاردىڭ مۇراسىن بىرىكتىرەتىن «تۇركى ايەلدەرى ەنسيكلوپەدياسىن» جارىققا شىعارۋ باستاماسىن كوتەردى.
«ەجەلگى زامانداردان باستاپ بۇگىنگى كۇنگە دەيىن تۇركى ايەلدەرى ءبىلىم ارقىلى قوعامعا قىزمەت ەتىپ كەلەدى. بۇل ءۇردىس – ۇلتتىڭ دامۋى مەن وركەندەۋىنىڭ كەپىلى. بولاشاقتا دا تۇركى ەلدەرى ايەلدەردىڭ ءبىلىم الۋىنا جاعداي جاساپ، ولاردىڭ الەۋەتىن تولىق ىسكە اسىرۋعا كۇش سالۋىمىز ماڭىزدى. وسى تۇستا تۇركى ەلدەرى اراسىندا قىز بالالاردىڭ ءبىلىم الۋىنا قاتىستى تاريحي اناليزگە نەگىزدەلگەن وقۋلىق جازۋدى ۇسىنامىن. سونداي-اق تۇركى ەلدەرى اراسىندا ايەل عالىمدار مەن اعارتۋشىلاردىڭ مۇراسىن زەرتتەپ، ناسيحاتتاۋ ماقساتىندا «تۇركى ەلدەرىنىڭ ايەلدەر ەنسيكلوپەدياسىن» ءۇش ۋنيۆەرسيتەت بىرگە جازۋدى ۇسىنامىن»، – دەدى گۇلميرا ءامىرحان قىزى.
ۋنيۆەرسيتەت رەكتورى ۇسىنعان جوبالار تۇركى الەمىندەگى ايەلدەردىڭ تاريحي ءرولىن جۇيەلى تۇردە زەرتتەۋگە، تۇركى قوعامىنداعى گەندەرلىك تەڭدىك پەن ءبىلىم بەرۋ سالاسىنداعى جەتىستىكتەردى پاش ەتۋگە باعىتتالعان.
ايتا كەتەيىك، قىزدار ۋنيۆەرسيتەتى – ورتالىق ازياداعى قىزدارعا ارنالعان جالعىز جوعارى وقۋ ورنى. ءبىلىم مەن مادەنيەت ارقىلى تۇركى حالىقتارىن جاقىنداستىرۋ باعىتىندا اتقارىلىپ جاتقان باستامالاردا ۋنيۆەرسيتەت بەلسەندى سەرىكتەس رەتىندە تانىلىپ كەلەدى.