ۇزىندىعى 5، بيىكتىگى 3 مەتر بولاتىن كولىكتىڭ ىشىندە كەرەۋەتتەر، جۋىناتىن بولمە، اجەتحانا، ىستىق سۋ، گاز پەشى جانە توڭازىتقىش بار
ەل ءىشى – ونەر كەنىشى. الماتى وبلىسى تالعار قالاسىنىڭ تۇرعىنى قاراپايىم كولىكتەن ءاۆتوۇي جاساپ العان، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
وتباسىلىق دەمالىسقا ارنالعان ماشينادا ءومىر سۇرۋگە قاجەتتىنىڭ ءبارى بار. يمپورتتىق ۇيلەر كوڭىلىنەن شىقپاعان سوڭ ءارى ءبىزدىڭ جولدارعا بەيىم بولماعاندىقتان ءوز قولىمەن قۇراستىرۋعا بەل بۋىپتى.
قاراپايىم پيكاپتان جاسالعان بۇل ءاۆتوۇي شاعىن وتباسىنا ابدەن لايىق. 5 ادامعا ارنالعان كولىكتى قىسقى ماۋسىمدا دا پايدالانۋعا بولادى. ياعني شاتىرداعى كۇننەن قۋات الاتىن پانەل ەلەكتر قۋاتى، جىلۋ مەن ىستىق سۋدى قامتاماسىز ەتەدى. ال كولىكتىڭ قابىرعاسى قىستىگۇنى اياز وتكىزبەيتىن ارنايى ماتەريالمەن قاپتالعان.
ەۆگەنيي مەلنيكوۆ ۇزاق جىل جۇك كولىگىن تىزگىندەپ، اۋىر تەحنيكالاردى جوندەۋمەن اينالىسقان. وتباسىمەن ءجيى ساياحاتقا شىعاتىن شەبەر ءاۆتوۇي ساتىپ العىسى كەلگەنىمەن، ەلىمىزدەگى جولعا شىدامدى ءارى ءوزىنىڭ تالعامىنا ساي كولىك تاپپاعان. سودان كەيىن ارمانىنداعى ءاۆتوۇيدى ءوزى قۇراستىرۋعا كىرىسىپتى.
«ەكى جىلدا جاسالعان بۇل كولىكتىڭ وزگە اۆتوۇيلەردەن سىرتتاي ايىرماشىلىعى جوق بولعانىمەن، ساپاسى مەن تەحنيكالىق مۇمكىندىگى جوعارى»، – دەيدى شەبەر.
«ءبىز ءتورت جىلدا بۇل كولىكپەن تۇركىستان، تاراز، شىمكەنت جانە بالقاشقا بارىپ قايتتىق. شونجىعا ءجيى بارىپ تۇرامىز. قوناق ءۇي ىزدەپ، ءدامحانا ىزدەپ اۋرە بولمايمىز. ءوزىمىز تاماق جاساپ، وسىندا تۇنەيمىز. ەندى وسى اۆتوۇيمەن ەۋروپاعا ساياحاتتاپ قايتۋدى ارماندايمىن»،-دەيدى شەبەر ەۆگەنيي مەلنيكوۆ.
ۇزىندىعى 5، بيىكتىگى 3 مەتر بولاتىن كولىكتىڭ ىشىندە كەرەۋەتتەر، جۋىناتىن بولمە، اجەتحانا، ىستىق سۋ، گاز پەشى جانە توڭازىتقىش بار. وسى اۋىر سالماقتى بەرىك قىلۋ ءۇشىن قۇرىلىمنىڭ قابىرعاسى مەن شاتىرى اعاشتان ويىلىپ، كەمەگە ارنالعان جەلىم پايدالانىلعان. ال يمپورتتىق اۆتوۇيلەردىڭ قۇرىلىمى ءالسىز، جەلىمى ساپاسىز بولادى ەكەن.
«بۇل ءاۆتوۇيدى جاساۋ بارىسىندا ءارتۇرلى يدەيالاردى جۇزەگە اسىردىق. ءۇيدى ەدەنىنەن باستاپ قۇراستىردىق، ەلەكتر سىمدارىن تارتىپ، سالقىنداتقىش پەن جىلۋ قۇبىرلارىن جۇرگىزدىك. قولىمىز بوس كەزدە اينالىسقاندىقتان ەكى جىلداي ۋاقىت پەن 10 ميلليوننان اسا قاراجات كەتتى»،-دەدى شەبەر.
ەۆگەنيي مەلنيكوۆ بوس وتىرماي، ەكىنشى جوباسىن باستاپ كەتكەن. ەندى ول 3 ادامعا ارنالعان، شاعىن ءاۆتوۇي قۇراستىرىپ جاتىر. ەكىنشى جوبا قاراپايىم ءارى جەڭىل بولاتىنىن ايتادى.