الماتى وبلىسى پوليسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسى تالعار اۋدانىندا قورقىتىپ الۋمەن جانە توناۋمەن اينالىسقان قىلمىستىق توپتىڭ ارەكەتىنە توسقاۋىل قويدى، دەپ حابارلايدى aqshamnews.kz.
تەرگەۋ ناتيجەسىندە توپتىڭ ۇيىمداستىرۋشىسى قاينازار اۋىلىنىڭ 19 جاستاعى تۇرعىنى ەكەنى انىقتالدى. ولار الەۋمەتتىك جەلى ارقىلى قۇرباندارىن ىزدەگەن. توپ قۇرامىندا 17 جاستاعى قىز بولعان. ول جابىرلەنۋشىلەرمەن تانىسىپ، كەزدەسۋگە ۇسىنىس جاساپ، ولاردىڭ سەنىمىنە كىرگەن.
الايدا ءبىراز ۋاقىتتان كەيىن قىزدىڭ "اعالارى" كەلىپ، جابىرلەنۋشىنى جالعان ايىپتاۋلار ارقىلى قورقىتا باستاعان. ولار جىنىستىق قاتىناسقا قاتىستى ايىپ تاعۋ ارقىلى اقشا تالاپ ەتىپ، كەي جاعدايلاردا كۇش قولدانعان. قاسكويلەر جابىرلەنۋشىلەردىڭ قۇجاتتارى مەن باعالى زاتتارىن تارتىپ الىپ، قوماقتى قاراجات اۋدارۋعا ماجبۇرلەگەن.
قىلمىستىق توپتىڭ كەزەكتى قۇربانى – 24 جاستاعى الماتى تۇرعىنى. بوپسالاۋشىلار ونى كۇشتەپ ۇستاپ، جەكە قۇجاتتارى مەن كولىك قۇجاتتارىن تارتىپ العان. سونىمەن قاتار، 100 000 تەڭگە اۋدارۋدى تالاپ ەتىپ، ودان ءارى 1،4 ملن تەڭگە بەرۋگە ماجبۇرلەمەك بولعان.
جەدەل ىزدەستىرۋ شارالارى بارىسىندا پوليسيا قىزمەتكەرلەرى قىلمىستىق توپتىڭ مۇشەلەرىن ۇستادى. ولاردىڭ ۇستىنەن بوپسالاۋ دەرەگى بويىنشا قىلمىستىق ءىس قوزعالدى. جالپى سانى جەتى ادام ۇستالىپ، تورتەۋى نەگىزگى كۇدىكتى رەتىندە ۋاقىتشا ۇستاۋ يزولياتورىنا قامالدى. قازىرگى ۋاقىتتا تەرگەۋ جالعاسىپ، ولاردىڭ وزگە قىلمىستارعا قاتىسى تەكسەرىلۋدە، – دەدى وبلىستىق پوليسيا وكىلدەرى.
قۇقىق قورعاۋ ورگاندارى قىلمىستىق توپتىڭ وزگە دە قۇرباندارى بولۋى مۇمكىن ەكەنىن جوققا شىعارمايدى. وسىعان بايلانىستى زارداپ شەككەندەردەن پوليسياعا حابارلاسۋ سۇرالادى. تەرگەۋ امالدارى جالعاسۋدا.