قۇرىلىستى 2019 جىلى اكىمدىك قابىلداپ العان.
مەكتەپ بار، ءبىراق ساباق وتپەيدى. تالعار اۋدانىنا قاراستى داۋلەت اۋىلىندا وقۋشىلار 3 جىلدان بەرى ونلاين وقۋعا ءماجبۇر، دەپ حابارلايدى Almaty-akshamy.kz Almaty.tv-گە سىلتەمە جاساپ.
قۇرىلىستى 2019 جىلى اكىمدىك قابىلداپ العان. و باستا تاپسىرىس بەرۋشى دە - وسى مەملەكەتتىك مەكەمە. 1،6 ملرد تەڭگەگە كەلىسىم جاساسقان بولىمنەن ماسەلەنىڭ اق-قاراسىن اجىراتىپ سۇراعان ەدىك، باس مامان ءىستىڭ باسى-قاسىندا بولماعانىن ايتتى. اكىم دە، ورىنباسارلارى دا ورنىندا جوق.
داۋدىڭ باسى - داۋلەتتەگى مەكتەپتىڭ ساپاسى. 2017 جىلدىڭ جەلتوقسانىندا باستالعان قۇرىلىس اراعا 2 جىل سالىپ قولدانىسقا بەرىلەدى. العاشىندا كارانتينگە، كەيىننەن 2 رەت كۇردەلى جوندەۋگە جابىلىپ، وقۋشىلار ونلاين وقۋعا كوشكەن.
«ونلاين ساباقتى اتا-انالاردىڭ ءبارى قالامايدى. مەنىڭ 2 ۇلىم بار، ەكەۋى دە ونلاين وقيدى. ونلاين ساباقتا بالانىڭ ءبىلىمى وتە تومەن. تومەن ەمەس، وتە تومەن»، – دەدى داۋلەت اۋىلىنىڭ تۇرعىنى سالتانات وتاربايەۆا.
«نەمەرەم 1 سىنىپتان باستاپ ونلايندا وقىدى. مىنە، ءقازىر 3 سىنىپ. ءۇش جىل بولدى جوندەۋ جۇمىسى ءجۇرىپ جاتقانىنا. وسى مەكتەپكە 1 ملرد 600 مىڭ اقشا ءبولدى، ول قايدا كەتتى؟» – دەدى داۋلەت اۋىلىنىڭ تۇرعىنى اسەم اتاگەلدييەۆا.
2020 جىلى قاڭتاردا-اق جەر استىنداعى سۋدىڭ دەڭگەيى كوتەرىلىپ، مەكتەپتىڭ قابىرعاسى مەن ەدەنى وتىرا باستاعان. قۇرىلىسشىلار نەگىزى سەبەپ عيمارات شوگىندى اۋماققا تۇرعاندىعىن ايتتى. ەدەن كەمى 60 سمگە شوككەن، ونى بيىكتەتۋ ءۇشىن اركىم كەلىپ ءۇش قابات سەمەنت توسەپتى. ال ارماتۋرا مۇلدەم سالىنباعان. عيماراتتىڭ العاشقى قاباتىن قايتا بۇزعان جۇمىسشىلار جالاقىعا جەتە الماي ءجۇر. «بىزگە 1،5 ملن قارىز. 15 ادام ءبىر اپتا بولدى جۇمىستى توقتاتتىق. «اقشانى انە بەرەمىز، مىنە بەرەمىز» دەپ سوزا بەرەدى»، – دەدى جالدامالى جۇمىسشى عابيت اميروۆ.
جۇمىسشىلار مەن قۇرىلىستىڭ جايىنا تىكەلەي جاۋاپتى ماماندار جاۋاپ بەرۋدەن جالتاردى. ال وقۋشىلار ءداستۇرلى فورماتقا تەك ساراپتاما ناتيجەسى شىققان سوڭ اۋىسا الادى.
«قۇبىر تارتىلىپ، تولىعىمەن اياقتالادى. وسى ايدىڭ سوڭىن كۇتىپ وتىرمىز. سول اياقتالعاننان كەيىن بالالاردى وفلاين وقىتۋ ماسەلەسىن قاراستىرامىز»، – دەدى تالعار اۋداندىق ءبىلىم ءبولىمىنىڭ باسشىسى ايناكۇل ۇشكەمپىروۆا.
«وسى جۇمىسقا سالعىرت قاراعانى ءۇشىن الماتى وبلىسى اكىمدىگى تاراپىنان ساۋلەت جانە قۇرىلىستى باقىلاۋ باسقارماسىنىڭ باسشىسىنا قاتىستى قىزمەتتىك تەكسەرۋ جۇرگىزىلىپ جاتىر. الماتى وبلىسىنىڭ اكىمى مارات سۇلتانعازييەۆ وبلىس پروكۋرورىنا جۇمىسقا تىكەلەي تەكسەرۋ جۇرگىزۋدى سۇراعان بولاتىن»، – دەدى الماتى وبلىسى اكىمى باسپا ءسوز قىزمەتىنىڭ باسشىسى عالىمۇرات جۇكەل.
ماسەلە جۋىق ارادا شەشىلمەسە، تۇرعىندار تىم قۇرىعاندا ەسكى مەكتەپكە قايتارۋدى سۇرايدى. ءبىراق ونىڭ دا ءبۇتىنى ءبولىنىپ، جارتىسى جارىلعان. ال جوندەۋى جونگە كەلمەگەن مەكتەپ ءالى دە اپاتتى جاعدايدا دەپ تانىلماي تۇر.