ينۆەستورعا قويىلاتىن باستى تالاپ – جوبانىڭ ناتيجەلىگى
اۋىل شارۋاشىلىعى سالالارى بويىنشا مەملەكەتتىك سۋبسيديا بەرۋدە قوسىمشا مىندەتتەر جۇكتەلەدى. بۇل تۋرالى ق ر اۋىل شارۋاشىلىعى ءمينيسترى ەربول قاراشوكەيەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«سۋبسيديانى ءتيىمدى ەتە تۇسۋدەگى تاعى ءبىر جاڭاشىلدىق - قوسىمشا مىندەتتەر ەنگىزۋ. تالاپتارعا كەلسەك، سۋبسيديا الاتىن اۋىل شارۋاشىلىعى ءونىمىن وندىرۋشىلەر ىشكى نارىق سۇرانىسىن ەسەپكە الا وتىرىپ باعا تۇراقتىلىعىن ساقتاۋى ءتيىس. بۇل ماسەلە بويىنشا ءقازىر ساۋدا جانە ينتەگراسيا مينيسترلىگىمەن بىرلەسكەن جۇمىس ءجۇرىپ جاتىر. سونىمەن قاتار جۇمىسشىلاردىڭ جالاقىسىن ورتاشا دەڭگەيدەن تۇسىرۋگە جول بەرمەۋدى كوزدەيمىز. سول سياقتى 5 جىلدا ءبىر رەت ينۆەستيسيا قۇيۋ مىندەتى تالاپ ەتىلمەك»، - دەدى ەربول قاراشوكەيەۆ ماجىلىستە وتكەن دوڭگەلەك ۇستەل بارىسىندا.
سونداي-اق، مينيستر اۋىل شارۋاشىلىعى سالاسىندا ينۆەستجوبالارعا جەڭىلدىك بولاتىنىن ايتتى.
«ينۆەستورعا قويىلاتىن باستى تالاپ – جوبانىڭ ناتيجەلىگى. وسى ورايدا ءبىز ينۆەستيسيالىق جوبالارعا سۋبسيديانىڭ 75 پايىزىن بىردەن بەرمەكپىز. قالعان 25 پايىزى جوبا ناتيجە اكەلگەن سوڭ وتەلەدى»، - دەيدى ول.
بۇعان دەيىن ەربول قاراشوكەيەۆ سۋبسيديالاۋ پروسەسىنىڭ ەلەكتروندى فورماتقا كوشەتىنىن ايتقان ەدى.
اتالعان جيىندا ق ر پارلامەنتى ءماجىلىسىنىڭ دەپۋتاتى، اگرارلىق ماسەلەلەر كوميتەتىنىڭ مۇشەسى اسقاربەك ۇيسىمبايەۆ وتاندىق ءسۇت ءوندىرىسىنىڭ دامۋىنا الاڭداۋشىلىق ءبىلدىردى.
ونىڭ ايتۋىنشا، قازاقستاندا 3 ملن توننا ءسۇت ونىمدەرىنىڭ تاپشىلىعى بار.