الماتى پروكۋراتۋراسى ۆاينەرلەر مەيىرجان تورەبايەۆ پەن مەيىرحان شەرنيازوۆتىڭ ءىسىن سوتقا جولدادى

ءىس فيگۋرانتتارى ادىلەت وراز بەن ءازىمجان سايدبايەۆ ءالى ىزدەستىرىلىپ جاتىر.

الماتى پروكۋراتۋراسى "قارجى پيراميداسىن قۇردى جانە ونى باسقاردى" دەپ ايىپتالعان ۆاينەرلەردىڭ ءىسى المالى اۋداندىق سوتىنا جولداندى، دەپ حابارلايدى Almaty-akshamy.kz.

"الماتى قالاسىنىڭ پروكۋراتۋراسى ۇيىمداسقان قىلمىستىق توپ قۇرامىندا قارجى (ينۆەستيسيالىق) پيراميداسىن قۇرۋ جانە ونى باسقارۋ فاكتىسى بويىنشا قىلمىستىق ءىستى الماتى قالاسىنىڭ المالى اۋداندىق سوتىنا ا. قۇرمانعالييەۆ، ر. بۋركانوۆ، د. راحيموۆا، د.چا، ا. رۇستەموۆ، ت. كاسەنوۆ، س. كاسەنوۆ، ن. سۇلتانبايەۆ، م. شەرنيازوۆ، م. تۋرەبايەۆ، ب. جارمۇحامەد، ەرلان جانە ەرجان مانسۋروۆتاردى ايىپتاۋ بويىنشا قىلمىستىق ءىستى سوتقا جولدادى"، - دەپ حابارلادى الماتى پروكۋراتۋراسى.

سونىمەن بىرگە ءىس فيگۋرانتتارى ادىلەت وراز بەن ءازىمجان سايدبايەۆ ءالى ىزدەستىرىلىپ جاتقانى، ولارعا حالىقارالىق ىزدەۋ جاريالانعانى حابارلاندى.

قىلمىستىق ءىس اياسىندا 41 جىلجىمايتىن مۇلىككە، 3 اۆتوكولىككە، 9 بانكتىك شوتقا جانە 16 كومپانيانىڭ جارعىلىق كاپيتالىنداعى ءارتۇرلى ۇلەستەرگە تىيىم سالىنعان. ءىس بويىنشا ايىپتاۋدى پروسەسسۋالدى پروكۋرور قولدايدى.

ەسكە سالايىق، 2022 جىلعى 10 اقپانىندا ۆاينەرلەر مەيىرجان تورەبايەۆ پەن مەيىرحان شەرنيازوۆقا قاتىستى "قارجى (ينۆەستيسيا) پيراميداسىن قۇرۋ جانە باسقارۋ" بابى بويىنشا قىلمىستىق ءىس قوزعالدى. ولاردى قاماۋدا ۇستاۋ مەرزىمى بىرنەشە رەت ۇزارتىلدى. كەيىنگى رەت 21 قاراشادا تاعى ءبىر ايعا، 19 جەلتوقسانعا دەيىن قاماۋدا ۇستالاتىنى حابارلانعان ەدى.