اۋداننىڭ بارلىق سايلاۋ كوميسسياسى ماڭىزدى ناۋقانعا دايىن.
14 شىلدە كۇنى قازاقستاندا اۋداندىق ماڭىزى بار قالالاردىڭ، كەنتتەر مەن اۋىل اكىمدەرىنىڭ سايلاۋالدى ۇگىت-ناسيحات جۇمىستارى باستالادى، دەپ حابارلايدى Almaty-akshamy.kz Almaty.tv سايتىنا سىلتەمە جاساپ.
ءدال ءقازىر وڭىرلەردە ناۋقانعا دايىندىق قىزۋ ءجۇرىپ جاتىر. بەلگىلى بولعانداي، الماتى وبلىسىنىڭ تالعار اۋدانىنىڭ وزىندە بىردەن 4 اۋىلدىق وكرۋگتىڭ اكىمى اۋىسادى.
«وتباسىمىز جانە تۋىس-باۋىرلارىمىزبەن بارىپ، ءوز داۋىسىمىزدى بەرەمىز. تاڭداۋىمىزدى جاسايمىز»، – دەدى بەساعاش اۋىلىنىڭ تۇرعىنى گۇلجامال تاسانوۆا.
الماتى وبلىسى تالعار اۋدانىنا قاراستى بەساعاش اۋىلدىق وكرۋگىنىڭ تۇرعىندارى 25 شىلدەدە وتەتىن سايلاۋ كۇنى مىندەتتى تۇردە داۋىس بەرۋگە كەلەتىندەرىن ايتتى. سەبەبى سايلاۋ ناتيجەسى جالپى ءبىر اۋىلدىڭ تاعدىرىنا اسەر ەتەدى، سوندىقتان بۇل ناۋقاننىڭ ولار ءۇشىن ماڭىزى زور بولماق.
«25 شىلدە اۋىلدىق اكىمدەردىڭ سايلاۋى بولعالى جاتىر. اۋىل تۇرعىنىن سايلاعىمىز كەلەدى. ءوزىمىز وتباسىمىزبەن كەلىپ، سايلاۋعا قاتىسامىز. اۋىلعا كومەكتەسەدى دەپ ۇمىتتەنەمىز، تاڭداعان كانديداتىمىزعا داۋىس بەرەمىز»، – دەدى بەساعاش اۋىلىنىڭ تۇرعىنى زەينەحان نازەكەنوۆا.
تالعار اۋدانىندا رەسمي تۇردە تىركەلگەن كوروناۆيرۋستىڭ ءۇندى شتاممىنا بايلانىستى، ساقتىق شارالارى قاتاڭ ساقتالادى. سايلاۋ ورىندارىندا جۇقپالى ىندەتتىڭ الدىن الۋ ماقساتىندا كىرەبەرىسكە باكتەريسيدتىك تۋننەل قويىلىپ، تەرمومەتر مەن انتيسەپتيكتەر قولدانىلادى. ال داۋىس بەرۋشىلەر ءۇشىن مەديسينالىق بەتپەردەلەر مەن ارنايى قولعاپتار دا دايىن.
«بۇگىندە اۋداننىڭ بارلىق سايلاۋ كوميسسياسى ءوز جۇمىسىنا دايىن. تەحنيكا مەن ماتەريال جاعىنان تولىق قامتىلعان. كانسەليارلىق تاۋارلار سىندى شىعىندار ءۇشىن قوسىمشا كومەك بولادى»، – دەدى تالعار اۋداندىق سايلاۋ كوميسسياسىنىڭ ءتوراعاسى مۇحيت دۇيسەبايەۆ.
تالعار اۋدانى بويىنشا اكىم لاۋازىمىنا ءتورت اۋىلدىق وكرۋگتەن ءوزىن 36 ادام ۇسىنعان. ال اۋىل حالقى ءوز تاڭداۋىن 23 سايلاۋ ورنىنىڭ بىرىندە جاساي الادى. بۇگىندە جالپى رەسپۋبليكا بويىنشا 2500-گە جۋىق اۋىلدىق وكرۋگ اكىمى بار. سوڭعى مالىمەتتەرگە سۇيەنسەك، جالپى ۇمىتكەر سانى 775 ادامدى قۇرايدى.