2013-2021 جىلدار ارالىعىندا 1026 پاتەر زاڭسىز بەرىلگەن
تالدىقورعاندا زاڭسىز بەرىلگەن 46 پاتەردى قوجايىندارى اكىمدىكتىڭ مەنشىگىنە قايتارىپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ودان بولەك 147 پاتەردى سىبايلاس جەمقورلىققا قارسى ءىس-قيمىل اگەنتتىگىنىڭ جەتىسۋ وبلىسى بويىنشا دەپارتامەنتى قانداي جولمەن بەرىلگەنىن تەكسەرىپ جاتىر.
«مەملەكەت مەنشىگىنە قايتارىلعان 46 پاتەر ءقازىر كەزەكتە تۇرعاندارعا ۇلەستىرىلىپ جاتىر. ونىڭ 18ء-ى كەزەكتە تۇرعان الەۋمەتتىك وسال توپتارعا، 12ء-ى ءتۇرلى مەملەكەتتىك قىزمەتتە ىستەيتىن قىزمەتشىلەرگە قىزمەتتىك پاتەر رەتىندە بەرىلدى. ال ودان بولەك 147 پاتەردىڭ قانداي جولمەن بەرىلگەنىن انتيكور تەكسەرۋدە»، - دەدى تالدىقورعان قالاسى اكىمىنىڭ باسپا ءسوز قىزمەتىنىڭ حاتشىسى مادي شاكەنوۆ.
ۆەدومستۆو وكىلىنىڭ ايتۋىنشا، 2013-2021 جىلدار ارالىعىندا 1026 پاتەر زاڭسىز بەرىلگەن. ودان بولەك 669 پاتەر الەۋمەتتىك وسال توپتارعا، ال 357 پاتەر بيۋدجەت پەن مەملەكەت قىزمەتكەرلەرىنە بەرىلگەن.
«669 پاتەر يەسىنىڭ 545ء-ى ءوزىنىڭ وسال توپقا جاتاتىنىن دالەلدەيتىن قۇجاتتارىن اكەلدى. جۇمىستار جالعاسۋدا»،- دەدى مادي شاكەنوۆ.
ەستەرىڭىزگە سالا كەتەيىك، بۇعان دەيىن تالدىقورعاندا مىڭنان اسا باسپانانىڭ زاڭسىز بەرىلگەنىن حابارلاعان بولاتىنبىز.
ءقازىر وبلىس ورتالىعىندا 180 مىڭ حالىق بار. ال، باسپانا كەزەگىندە 14 900 ادام تۇر.