ماقسات – تاۋاردىڭ تالاپقا قانشالىقتى ساي كەلەتىنىن تەكسەرۋ.
پيروتەحنيكادان كەلەر ءقاۋىپ كوپ. بىلتىرعى جىلدىڭ وزىندە جاڭاجىلدىق دەمالىستا قالا بويىنشا 15 ءورت جاعدايى تىركەلگەن، دەپ حابارلايدى Almaty-akshamy.kz Almaty.tv-گە سىلتەمە جاساپ.
«مۇنىڭ ءبارى قاۋىپسىزدىك ەرەجەسىن ساقتاماۋدان»، - دەيدى ماماندار.
ءورت وقيعاسى مەرەكەدە ءورشىپ كەتەدى دەگەن توتەنشەلىكتەر بۇگىن اۋدان اۋماعىنداعى پيروتەحنيكا ساتاتىن ورىنداردى ارالادى. ماقسات – تاۋاردىڭ تالاپقا قانشالىقتى ساي كەلەتىنىن تەكسەرۋ. وكىنىشتىسى، ساۋداگەرلەر ارنايى رۇقساتتامانىڭ جايىنا نازار اۋدارا بەرمەيدى، ەرەجەنى ساقتامايدى. «ال بۇل ءوز كەزەگىندە جاۋاپتان جالتارۋعا، وقىس وقيعا بولا قالسا، باسىن الىپ قاشۋعا سەبەپ»، - دەيدى ماماندار.
«جىل سايىن قالا اۋماعىندا ورتا ەسەپپەن جاڭا جىل مەرەكەسى كەزىندە 15 ءورت وقيعاسى تىركەلەدى. ونىڭ 15 پايىزى پيروتەحنيكالىق ونىمدەردى قولدانۋ كەزىندە ورىن الادى. سوندىقتان، سوڭعى 6 جىلدا 80 ءورت بولدى، ولاردىڭ 10-ىنىڭ شىعۋىنا پيروتەحنيكالىق ونىمدەر سەبەپ بولعان»، – دەدى المالى اۋداندىق تجب باس مامانى ەربول ءالىمقۇل.
وسى جانە وزگە دە ءورت قاۋىپسىزدىگىنىڭ الدىن الۋ شارالارىمەن تانىستىرعان ماماندار تەكسەرىستىڭ ءالى دە كۇشەيە تۇسەتىنىن ايتادى. ويتكەنى، ءتىلسىز جاۋدان زارداپ شەگىپ، تىركەلگەندەردىڭ سانى ازايماي تۇر.
«كوبىنەسە، ءورت جاعدايى ەلەكتر توعىنىڭ كەسىرىنەن بولادى. تۇنگى ۋاقىتتا كەيبىر جالعا الۋشىلار جارىقتى وشىرمەي تاستاپ كەتەدى. وسى جاعداي بويىنشا ءقازىر شارا قولدانامىز»، – دەدى ساۋدا ورتالىعى ءورت قاۋىپسىزدىگى ءبولىمى باسشىسىنىڭ ورىنباسارى تاڭجارىق قۇرمانوۆ.
جازاتايىم جايتتان ساقتانۋ ءۇشىن قاۋىپسىزدىكتى ساقتاۋ اسا ماڭىزدى. ماماندار اۋەلگى كەزەكتە مەرەكەلىك وتشاشۋدى ارنايى دۇكەندەردەن عانا ساتىپ الۋدى ۇسىنادى.