مادەنيەت سالاسىندا 1 ملن-نان استام بالانى قامتيتىن ءبىرقاتار اۋقىمدى جوبا جۇزەگە اسقان.
بيىل بالالار جىلى باستالعالى بەرى 69 اۋقىمدى ءىس-شارا وتكىزىلگەن، دەپ حابارلايدى Almaty-akshamy.kz Almaty.tv-گە سىلتەمە جاساپ.
مادەنيەت جانە سپورت مينيسترلىگى «ۇلاعاتتى ۇرپاق»، «تالانتتار ارامىزدا»، «مەيىرىم» فەستيۆالى سىندى جوبالاردى جۇزەگە اسىرىپ، 1 ميلليوننان استام بوبەك وسى باعدارلامالارعا قاتىستى دەپ وتىر.
مادەنيەت جانە سپورت مينيسترلىگى بالالار جىلىندا قولعا الىنعان جوبالاردىڭ بارلىعى جۇزەگە اسىرىلدى دەيدى. باعدارلاما اياسىندا 1 ملن-نان استام بالا قامتىلعان ەكەن. ونىڭ ىشىندە رەسپۋبليكالىق «ۇلاعاتتى ۇرپاق» مادەني ءبىلىم بەرۋ ونلاين جوباسى بار. بۇگىندە ول سايتتار مەن الەۋمەتتىك جەلىلەردە جۇرگىزىلۋدە. وسى كۇنى قارالىم سانى 2 ملن-نان اسىپتى.
«بالالار ادەبيەتىنە ارنالعان «دانا بالا» ۆەب-سايتى جۇمىس ىستەپ تۇر. بۇگىنگى تاڭدا 5 مىڭنان استام كىتاپتى سايتقا ورنالاستىردىق. سونىمەن قاتار، ەرەكشە قابىلەتى بار بالالاردىڭ شىعارماشىلىق الەۋەتىن اشۋعا ارنالعان «تالانتتار ارامىزدا» رەسپۋبليكالىق كورمە فەستيۆالىن وتكىزدىك. وعان 250-دەن استام بالا قاتىستى»، – دەدى ق ر مادەنيەت جانە سپورت ۆيسە-مينيسترى نۇرعيسا داۋەشوۆ.
مادەنيەت مينيسترلىگىنىڭ اقپارىنا ساي، اتقارىلعان ىستەر اۋقىمدى. الايدا ۆەدومستۆانىڭ مۇرىندىق بولۋىمەن جىل بويى جاسالعان شارالاردى حالىقتىڭ ءبىرى بىلسە، ءبىرى بىلمەيدى ەكەن.
بالالار جىلىندا جاقسى ەستە قالعان «ارتسپورت» جوباسى ەدى. باعدارلاما ارقىلى ميلليونداعان بوبەك قالاعان ۇيىرمەسىنە قاتىسىپ، ءوزىنىڭ بويىنداعى ونەرىن اشقان بولاتىن. الايدا پلاتفورما سوڭعى كەزدەرى توقتاپ، قارجىلاندىرۋ جەرگىلىكتى بيۋدجەتتەن بەرىلەتىن بولدى.
«قازىرگى تاڭدا بيىلدىڭ وزىندە كەيبىر قارجى جەتىسپەۋ ماسەلەلەرىنە بايلانىستى ۇكىمەت تاراپىنان دا «ارتسپورت» باعدارلاماسىنا قارجى ءبولىنىپ وتىر. بولاشاقتا ءار ءوڭىر ءوزىنىڭ ءتيىستى جۇمىستارىن بيۋدجەتتىك جوسپارلاۋ كەزىندە ناقتى ەسەبىن جوبالايدى دەگەن سەنىمدەمىز»، – دەدى ق ر مادەنيەت جانە سپورت ۆيسە-مينيسترى نۇرعيسا داۋەشوۆ
قىسقاسى، بيىل بالالار جىلىندا ولار مۋزەيگە تەگىن كىردى، تەگىن ساياحاتتادى، تەگىن كينو كوردى. ءتۇرلى فەستيۆالدەر مەن بايقاۋلار ۇيىمداستىرىلدى. مادەنيەت جانە سپورت مينيسترلىگىنىڭ ايتۋىنشا، بالالاردى قولداپ، دامىتۋ ءبىر جىلدى ارناۋمەن شەكتەلمەيدى. ارى قارايدا بالالارعا قاجەتتى كونتەنتتەر كوبەيىپ، ءتۇرلى شارالار ۇيىمداستىرىلادى.