ورتالىقتا جۇكتى ايەلدەرگە ۋلترادىبىستىق جانە بيوحيميالىق سكرينينگ جۇرگىزىلەدى.
تالدىقورعان پەرزەنتحاناسىندا قۇرساقتاعى ءسابيدى ساقتاۋ ورتالىعى اشىلدى، دەپ حابارلايدى اlmaty-akshamy.kz دەنساۋلىق ساقتاۋ مينيسترلىگىنىڭ رەسمي سايتىنا سىلتەمە جاساپ.
ماقسات – تۋا بىتەتىن دامۋ كەمىستىگىن ۋاقتىلى انىقتاۋ، ولاردان بولاتىن ءولىم-جىتىمنىڭ، بالالار اراسىنداعى سىرقاتتانۋشىلىق پەن مۇگەدەكتىكتىڭ الدىن الۋ.
ورتالىقتا جۇكتى ايەلدەرگە ۋلترادىبىستىق جانە بيوحيميالىق سكرينينگ جۇرگىزىلەدى. گەنەتيكتەر مەن اكۋشەر-گينەكولوگتەر كونسۋلتاسيا بەرەدى. پرەناتالدىق كونسيليۋمدا ۇرىقتىڭ دامۋ پاتولوگياسى انىقتالعان كەزدە بوسانۋ ءتاسىلى بەلگىلەنەدى. سونداي-اق، ورتالىقتا ۇرىقتىڭ انىقتالعان پاتولوگياسىن راستاۋ ءۇشىن ۋلترادىبىستىق دياگنوستيكانىڭ ەكىنشى دەڭگەيى بار.
«ورتالىقتىڭ نەگىزگى باعىتى – تۋا بىتەتىن پاتولوگيالارمەن كۇرەسۋ، ۇرىقتىڭ قالىپتاسۋىنا اسەر ەتەتىن جاعىمسىز فاكتورلاردى جويۋ، تۋا بىتەتىن اقاۋلار مەن حروموسومالىق اۋىتقۋلاردى انىقتاۋ كەزىندە جۇكتىلىكتى جالعاستىرۋ ماسەلەسى، جاڭا تۋعان نارەستەگە قاجەتتى مەديسينالىق كومەكتى ۋاقتىلى كورسەتۋ. گەنەتيكا بولىمىندە حروموسومالىق اۋىتقۋلارعا پرەناتالدىق بيوحيميالىق سكرينينگ جانە تۇقىم قۋالايتىن مەتابوليكالىق اۋرۋلارعا نەوناتالدىق سكرينينگ جۇرگىزىلەدى»، - دەدى جەتىسۋ وبلىسى دەنساۋلىق ساقتاۋ باسقارماسى باسشىسىنىڭ ورىنباسارى ايگەرىم لەبايەۆا.
پاتولوگيا انىقتالعان جاعدايدا جۇكتىلىكتى ودان ءارى جالعاستىرۋ نەمەسە توقتاتۋ ءتاسىلى تۋرالى ماسەلەلەردى شەشۋ ءۇشىن ۇرىق پاتولوگياسىنىڭ سيپاتىنا بايلانىستى كوپ بەيىندى كوميسسيا ۇيىمداستىرىلادى. كوميسسيانىڭ وتىرىسىندا وتباسىنا انىقتالعان اۋرۋدىڭ بارلىق سالدارى، جۇكتىلىكتى ۇزبەۋ تۋرالى شەشىم قابىلدانعان كەزدە بالانىڭ ومىرىنە بولجام جانە مۇگەدەكتىك دارەجەسى تۇسىندىرىلەدى.
بولاشاقتا ورتالىقتا ۇرىقتىڭ ينۆازيۆتىك پرەناتالدىق دياگنوستيكاسىن جۇرگىزۋ جوسپارلانىپ وتىر. بۇل – «حروموسومالىق پاتولوگيا» دياگنوزىنىڭ سوڭعى كەزەڭى بولىپ تابىلادى.