مەرەيتويلىق شارا سالتانات سارايىندا عىلىمي-پراكتيكالىق كونفەرەنسيامەن جالعاستى
بۇگىن تالدىقورعاندا جولبارىس ءبيدىڭ تۋعانىنا 350 جىل تولۋىنا وراي ەڭسەلى ەسكەرتكىشى اشىلدى. سول سياقتى عىلىمي-پراكتيكالىق كونفەرەنسيا ءوتىپ، تاريحي تۇلعانىڭ باتىرلىعىن، بي-شەشەندىگىن، قولباسشىلىعىن كەڭىنەن تانىتاتىن قوس كىتاپتىڭ تۇساۋى كەسىلدى، - دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
سالتاناتتى شاراعا وبلىس اكىمى اماندىق باتالوۆ، قازاقستان پرەزيدەنتىنىڭ كومەكشىسى قانات بوزىمبايەۆ، «جولبارىس بي» قوعامدىق قورىنىڭ ءتوراعاسى ومارحان وكسىكبايەۆ، مەملەكەت جانە قوعام قايراتكەرى امانگەلدى شابداربايەۆ قاتىستى.
«جولبارىس بي» قوعامدىق قورىنىڭ قارجىسىنا تۇرعىزىلعان ەسكەرتكىش تالدىقورعان قالاسىنىڭ 6-شى شاعىن اۋدانىندا ونەر مەكتەبىنىڭ جانىنداعى اشىق الاڭعا قويىلدى. قۇرمەتتى قوناقتار ەسكەرتكىشتىڭ لەنتاسىن قيىپ، جابۋىن تۇسىرگەن سوڭ، قۇتتىقتاۋ تىلەكتەر ايتىلدى.
الدىمەن ءسوز العان وبلىس اكىمى اماندىق باتالوۆ جەتىسۋ جەرىنىڭ باتىرلار مەن اقىنداردىڭ، بي-شەشەندەردىڭ تۋعان ولكەسى ەكەنىن اتاپ ءوتتى.
«ەلباسى نۇرسۇلتان ءابىش ۇلى نازاربايەۆتىڭ شەشىمىمەن الماتى وبلىسىنىڭ ورتالىعى بولعان تالدىقورعاننىڭ ءقازىر وسىپ-وركەندەگەن شاعىنا كۋا بولىپ وتىرمىز. وعان دا بيىل 20 جىل تولدى. وبلىستاعى ىرگەلى ىستەرگە پرەزيدەنتىمىز قاسىم-جومارت كەمەل ۇلى توقايەۆ زور قولداۋ كورسەتۋدە. «رۋحاني جاڭعىرۋ» باعدارلاماسى اياسىندا بيىل جامبىل بابامىزدىڭ 175، مۇقاعالي ماقاتايەۆتىڭ 90 جىلدىعىن وتكىزدىك، ەندى جولبارىس ءبيدىڭ 350 جىلدىعىن اتاپ ءوتىپ وتىرمىز. «جولبارىس بي» قورىنىڭ ازاماتتارى باستاما كوتەرىپ، ەسكەرتكىشتى دايىنداتىپ، مۇسىنشىلەر، قۇرىلىسشىلار بەلسەنە كىرىسىپ، بۇگىن، مىنە، ەل تاۋەلسىزدىگىنىڭ 30 جىلدىعى قارساڭىندا تالدىقورعاننىڭ تورىندە بي بابامىزدىڭ ەسكەرتكىشى قويىلدى. بۇل – ءوسىپ كەلە جاتقان ۇرپاقتارىمىزعا ۇلگى، تاربيە. ەسكەرتكىش قۇتتى بولسىن، بابا رۋحى ءبارىمىزدى قولداپ-قورعاپ ءجۇرسىن، ەلىمىز امان، زامانىمىز تىنىش بولسىن»، - دەدى ا. باتالوۆ.
ءوز سوزىندە «جولبارىس بي» قوعامدىق قورىنىڭ ءتوراعاسى، قوعام قايراتكەرى ومارحان وكسىكبايەۆ ەسكەرتكىشتى ورناتۋ ءۇشىن قورعا قارجىلاي قولداۋ كورسەتىپ، ءبىر مىڭداي ازامات اتسالىسقانىن ايتتى. جانە ەسكەرتكىشتى ورناتاتىن ورنىن بەلگىلەپ بەرگەن، رۋحاني دەمەۋ بولعان وبلىس، قالا باسشىلىعىنا دا ريزاشىلىعىن جەتكىزدى. سول سياقتى ۇلكەن جۇمىس تىندىرعان ساۋلەتشى، ءمۇسىنشى، قۇرىلىسشى ماماندارعا دا العىسىن ءبىلدىردى.
«بۇگىنگى شارانى حالقىنا سايا دا، پانا دا بولا بىلگەن باتىر، بي، اۋليە جولبارىس بابانىڭ رۋحىن جاڭعىرتۋ دەپ بىلەمىن. بابانىڭ بۇكىل 90 جىلدىق عۇمىرى ەلدىككە، ادىلدىككە دەگەن سۇيىسپەنشىلىككە تولى بولدى. ونىڭ وسى ونەگەلى ءومىرىن جاس ۇرپاققا جەتكىزە بىلسەك، وندا بابانى ۇلىقتاۋداعى ماقساتتىڭ ورىندالعانى»، - دەدى ومارحان وكسىكبايەۆ.
مۇنان سوڭ ەل پرەزيدەنتىنىڭ كومەكشىسى قانات بوزىمبايەۆ، مەملەكەت جانە قوعام قايراتكەرى امانگەلدى شابداربايەۆ، مادەنيەت جانە سپورت ءمينيسترىنىڭ كەڭەسشىسى ەرلان جۇرىنبايەۆ تا ايتۋلى شارانىڭ تاريحتى تانۋداعى، رۋحاني جاڭعىرۋداعى رولىنە توقتالىپ، قۇتتىقتاۋ تىلەكتەرىن جەتكىزدى. سونىمەن بىرگە ءانشى، سازگەر اعايشا يساعۇلوۆا كوپشىلىك ءۇشىن «جولبارىس بابام» ءانىن ورىنداپ بەردى.
مەرەيتويلىق شارا سالتانات سارايىندا عىلىمي-پراكتيكالىق كونفەرەنسيامەن جالعاستى. جيىندا الدىمەن جولبارىس بابا جايىنداعى جازۋشى، زەرتتەۋشى، جۋرناليست تالعات ايتباي ۇلى دايىنداعان «اڭىزبەن جەتكەن ابىز»، سول سياقتى «جىلقايدار ۇلى جولبارىس بي ەلىندە» اتتى قوس كىتاپتىڭ تۇساۋكەسەر ءراسىمى جاسالىپ، وقىرمانعا جول تارتتى.
كونفەرەنسيادا قوعام قايراتكەرلەرى، زەرتتەۋشىلەر، تاريحشىلار، اتاپ ايتقاندا، پارلامەنتى سەناتىنىڭ دەپۋتاتى باقىتجان جۇماعۇلوۆ، الماتى وبلىسىنىڭ قۇرمەتتى ازاماتى، قوعام قايراتكەرى ناۋرىز قىلىشبايەۆ، د.ا.قونايەۆ اتىنداعى ەۋرازيالىق زاڭ اكادەمياسىنىڭ رەكتورى، قادىرعالي بي اتىنداعى قوعامدىق قوردىڭ پرەزيدەنتى، قازاقستاننىڭ ەڭبەك سىڭىرگەن قايراتكەرى ءومىرالى جالايري، تاريح عىلىمدارىنىڭ دوكتورى، پروفەسسور، ق ر ۇعا اكادەميگى، قازاقستان تاريحشىلارى قاۋىمداستىعىنىڭ ءتوراعاسى مامبەت قويگەلدييەۆ مازمۇندى باياندامالار جاساپ، تاريحي دەرەكتەرگە توقتالدى.
«الماتى وبلىسىندا زەرتتەۋدى قاجەت ەتەتىن، حالىق بولىپ ۇلگى تۇتاتىن تاريحي تۇلعالار وتە كوپ. سولاردىڭ قاتارىندا «اقتابان شۇبىرىندى – القاكول سۇلاما» كەزەڭىندە باتىرلىق، شەشەندىك بولمىسى ايشىقتالا تۇسكەن جولبارىس ءبيدىڭ ورنى ەرەكشە. بابامەن قاتار ونىڭ كەيىنگى ۇرپاقتارىنىڭ دا ءتۇرلى تاريحي كەزەڭدەگى ءومىرى زەرتتەۋگە تۇرارلىق. كوپ جايتتار حالىق جادىندا ساقتالا بەرمەيدى. سوندىقتان ونى اڭىز-شەجىرەلەر، دەرەكتى قۇجاتتار نەگىزىندە جاڭعىرتىپ، قايتا تۇلەتۋ – ءبىزدىڭ پارىزىمىز»، - دەدى مامبەت قويگەلدييەۆ.
جالپى جولبارىس ءبيدىڭ 350 جىلدىعىنا ارنالعان شارالار اياسىندا كوركەمونەر گالەرەياسىندا قازاقستاننىڭ ەڭبەك سىڭىرگەن قايراتكەرى، قازاقستان جۋرناليستەر، سۋرەتشىلەر وداعىنىڭ مۇشەسى، جۋرناليست، سۋرەتشى جانۇزاق ءمۇساپىردىڭ جەكە كورمەسى وتەدى. سول سياقتى ب.ريموۆا اتىنداعى دراما تەاترىندا «امانات» سپەكتاكلىنىڭ پرەمەراسى بولادى.
اتاپ وتسەك، ەسكەرتكىشتىڭ اۆتورلارى – مارات ءنۇسىپوۆ، جانۇزاق ءمۇساپىر، باۋىرجان جۋاسپايەۆ. تۇعىرى گرانيتتەن، ەسكەرتكىشى – قودادان. جالپى بيىكتىگى – 10،10 م.