«ءسابي بولعىم كەلەدى» دەپ اتالعان كونسەرتكە ءبىرقاتار ونەر مايتالمانى جينالدى
الماتىدا مۇزبالاق اقىن مۇقاعالي ماقاتايەۆ پەن اقىن، سازگەر تۇرسىنعازى راحيموۆتى ەسكە الۋ كەشى ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قوس تارلاننىڭ شىعارماشىلىعىنا ارنالعان كونسەرتكە ءبىرقاتار ونەر مايتالمانى جينالدى.
ساحناسى ءان مەن اۋەزگە، سىرلى سازعا بولەنگەن «الاتاۋ» ءداستۇرلى ونەر تەاترىنداعى كەش كومپوزيتور تۇرسىنعازى راحيموۆتىڭ 70 جىلدىعىنا ارنالعان. ەسكە الۋ كونسەرتىن قالالىق مادەنيەت باسقارماسى، سونداي-اق سەمەي قالاسى اكىمدىگى قاتار ۇيىمداستىرىپ وتىر.
«بۇگىنگى كونسەرت تۇرسىنعازى اعامىزدىڭ اندەرىنىڭ شىعۋ تاريحىنىڭ حرونولوگياسىنان، ياعني جاس كۇنىنەن باستاپ شىعارعان اندەرىنەن باستالادى. بۇگىنگى شارادا اعامىزدىڭ سەمەيدەن كەلگەن ءانشى شاكىرتتەرى ونەر كورسەتەدى»، – دەدى سەمەي قالالىق مادەنيەت جانە تىلدەردى دامىتۋ ءبولىمىنىڭ باسشىسى نازەركە اققوجينا.
كوپ قوسىلا شىرقايتىن «ءسابي بولعىم كەلەدى» ءانىنىڭ سازىن جازعان تۇرسىنعازى راحيموۆ بولاتىن. بيىل 90 جىلدىعى اتالىپ ءوتىپ جاتقان مۇقاعالي شىعارماشىلىعىن كەڭ دارىپتەگەن كومپوزيتور اقيىق اقىننىڭ 35 ولەڭىنە ءان شىعارعانىن دا ايتا كەتۋ كەرەك. كومپوزيتورلىق قىرىن ماقاتايەۆ تۋىندىسىمەن تانىتقان ءانشىنى ەسكە الۋ كەشى دە تەگىننەن تەگىن بۇلاي اتالعان جوق.
«بۇگىنگى كەلگەن جاستاردىڭ ءبارى – ونىڭ كوزىن كورگەن، جانىندا ءجۇرىپ ءانىن ۇيرەنگەن شاكىرتتەرى. قازاق حالقى باردا، تۇرسىنعازى اعامىزدىڭ ەسىمى ماڭگىلىك جاساي بەرەدى»، – دەيدى ق ر ەڭبەك سىڭىرگەن ءارتىسى رامازان ستامعازييەۆ.
بۇگىنگى ەسكە الۋ كەشىنە ەلىمىزدىڭ ءبىرقاتار ونەر مايتالماندارى دا قاتىستى. ەلدىڭ جۇرەگىنەن ورىن العان انشى-كومپوزيتور ارتىنان 100-گە تارتا ءان-مۇرا قالدىردى.