ترانسشەكارالىق سۋدى پايدالانۋ
ق ر سىرتقى ىستەر مينيسترلىگىندە ەرەكشە تاپسىرمالار جونىندەگى ەلشى الەكسەي ۆولكوۆتىڭ شۆەيساريانىڭ سۋ ماسەلەلەرى جونىندەگى ارنايى وكىلى گي بونۆينمەن كەزدەسۋى ءوتتى، دەپ حابارلايدى Almaty-akshamy.kz قازاقپارات اگەنتتىگىنە سىلتەمە جاساپ.
سىرتقى ساياسي ۆەدومستۆو اتاپ وتكەندەي، تاراپتار قازاقستانداعى سۋ شارۋاشىلىعىنىڭ قازىرگى جاعدايى، ورتالىق ازياداعى سۋ سالاسىنداعى وڭىرلىك ىنتىماقتاستىقتىڭ قازىرگى احۋالى جانە حالىقارالىق سۋ كۇن تارتىبىنە قاتىستى ماسەلەلەردى تالقىلادى.
الەكسەي ۆولكوۆ ورتالىق ازيا ەلدەرىنىڭ ترانسشەكارالىق سۋدى پايدالانۋ سالاسىنداعى قارىم-قاتىناستارىنىڭ دامۋىنا ەرەكشە نازار اۋداردى.
ول سۋ سالاسىنداعى وڭىرلىك ىنتىماقتاستىقتى نىعايتۋ ىسىندەگى نۇر-سۇلتاننىڭ بەلسەندى ۇستانىمىن، سونداي-اق وسى باعىتتاعى قازاقستاندىق باسشىلىقتىڭ كۇش-جىگەرىن اتاپ ءوتتى.
سونىمەن قاتار، وتاندىق ديپلومات وڭىرلىك ىنتىماقتاستىقتىڭ، سونىڭ ىشىندە سۋ سالاسىنداعى ىنتىماقتاستىقتىڭ ودان ءارى نىعايۋىنا قازاقستاندا دامۋعا رەسمي كومەكتىڭ ۇلتتىق وپەراتورى بولىپ تابىلاتىن جاڭادان قۇرىلعان KazAID ۇيىمىنىڭ ءرولى مەن الەۋەتىن اتاپ ءوتتى.