حالىقتىق شتاب مۇشەلەرى تالدىقورعان قالاسىنداعى Halyk Bank ۇجىمىمەن كەزدەستى. كەزدەسۋ بارىسىندا اتوم ەلەكتر ستانسياسىنىڭ (اەس) قۇرىلىسى جانە ونىڭ ەل ەكونوميكاسىنا اكەلەتىن پايداسى جان-جاقتى تالقىلاندى، دەپ حابارلايدى aqshamnews.kz
اەس بار مەملەكەتتەر، اسىرەسە ۋران ءوندىرۋ جانە يادرولىق وتىن ءوندىرىسى دامىعان ەلدەر، تەك كومىر نەمەسە گازعا نەگىزدەلگەن ەكونوميكالارعا قاراعاندا الدەقايدا العا وزعان. قازىرگى ۋاقىتتا الەمدە اەس-تىڭ پايداسىن كورىپ وتىرعان كوپتەگەن مەملەكەتتەر بار.
جەتىسۋ وبلىستىق ءماسليحات ءتوراعاسى گۇلنار تويلىبايەۆا اەس قالدىقتارىنىڭ تۇرىنە جانە تەحنولوگياسىنا بايلانىستى ساقتالۋى نەمەسە قايتا وڭدەلۋى مۇمكىن ەكەنىن اتاپ ءوتتى.
– اەس جىلىنا شامامەن 80 كگ راديواكتيۆتى قالدىق شىعارادى. ءبىراق، مىسالى، پايدالانىلعان يادرولىق وتىن قالدىق بولىپ سانالمايدى، سەبەبى ونى قايتادان ەنەرگيا كوزى رەتىندە پايدالانۋعا بولادى. مۇنداي قالدىقتار ارنايى بوشكەلەردە ساقتالادى، – دەدى ول.
قازىرگى ۋاقىتتا الەم بويىنشا 415 يادرولىق ەنەرگەتيكالىق رەاكتور جۇمىس ىستەپ تۇر، ال تاعى 62ء-سى سالىنۋ ۇستىندە. اەس-تەردىڭ ەڭ كوپ سانى اقش-تا – 94 رەاكتور، فرانسيادا – 56، قىتايدا – 56، جانە جاپونيادا – 12 رەاكتور بار ەكەنى دە كەزدەسۋ بارىسىندا ايتىلدى.
«AMANAT» پارتياسىنىڭ جەتىسۋ وبلىستىق فيليالىنىڭ ءتوراعاسى ارىستانعالي ارىن اەس قۇرىلىسىنىڭ ەلەكتر ەنەرگياسىنىڭ تاپشىلىعىن ازايتۋعا، تاريفتەردىڭ ءوسۋىن تەجەۋگە، ەكولوگيانى جاقسارتۋعا جانە ەنەرگەتيكالىق تاۋەلسىزدىكتى قامتاماسىز ەتۋگە كومەكتەسەتىن سەنىمدى ءادىس ەكەنىن جەتكىزدى.
– كومىر ستانسيالارىنىڭ ەكولوگيا مەن ادام دەنساۋلىعىنا تەرىس اسەرى بار، سوندىقتان اەس بۇل ماسەلەلەردى شەشۋگە ماڭىزدى قادام، – دەدى ارىستانعالي ارىن.
بانك قىزمەتكەرلەرى اتوم ەلەكتر ستانسياسىنىڭ قورشاعان ورتا مەن قوعامعا تيگىزەتىن ىقتيمال زيانىنا الاڭداۋشىلىق ءبىلدىردى. ءوز كەزەگىندە، شتاب مۇشەلەرى اتوم ەنەرگەتيكاسىنىڭ قاۋىپسىزدىگى جاڭا دەڭگەيگە كوتەرىلگەنىن ءتۇسىندىردى. III+ بۋىن رەاكتورلارى قوسىمشا قاۋىپسىزدىك مۇمكىندىكتەرىمەن جابدىقتالعان. بۇل تەحنولوگيا ستانسا قىزمەتكەرلەرىن ەۆاكۋاسيالاۋ جانە ەلەكتر قۋاتىن ءوشىرۋ جاعدايىندا دا جۇمىس ىستەۋگە مۇمكىندىك بەرەدى.