الماتى قالاسىندا پوليسيا قىزمەتكەرلەرى ستوماتولوگيالىق ەمحانالاردىڭ بىرىنەن زاڭسىز ەلەكتروندى تەمەكى اينالىمىن انىقتاپ، 13 مىڭعا جۋىق ۆەيپ تاركىلەدى، دەپ حابارلايدى aqshamnews.kz Polisia.kz. cىلتەمە جاساپ.
جەدەل ىزدەستىرۋ شارالارى بارىسىندا ەمحانانىڭ قويماسىنان زاڭسىز ەلەكتروندى تەمەكىلەر تابىلدى. تەرگەۋ ناتيجەسىندە 32 جاستاعى ەر ادام ۇستالىپ، ونىڭ زاڭسىز اينالىممەن اينالىسقانى بەلگىلى بولدى. بۇرىن زاڭسىز ويىن بيزنەسىن ۇيىمداستىرعانى ءۇشىن سوتتالعان ول بۇل جولى دا زاڭسىز ارەكەتتەرگە بارىپ، دوسىنىڭ ەمحاناسىن ۆەيپتەردى ۋاقىتشا ساقتاۋ قويماسىنا اينالدىرعانىن مويىندادى.
الماتى قالالىق پد ەكسترەميزمگە قارسى كۇرەس باسقارماسىنىڭ باستىعى اسحات داۋلەتياروۆتىڭ ايتۋىنشا، ۇستالعان ازامات زاڭسىز بايۋ ماقساتىندا تىيىم سالىنعان ۆەيپ قۇرالدارىن جاسىرىن ساتۋمەن اينالىسقان. قازىرگى تاڭدا قىلمىستىق ءىستى مەدەۋ اۋداندىق پوليسيا باسقارماسى تەرگەپ جاتىر.
ەستەرىڭىزگە سالا كەتەيىك، 2024 جىلدىڭ 20 ماۋسىمىندا قازاقستاندا ۆەيپتەردى ساتۋعا تىيىم سالاتىن زاڭ كۇشىنە ەندى. قازاقستان رەسپۋبليكاسىنىڭ قىلمىستىق كودەكسىنە 301-1-باپ (شىلىم شەكپەيتىن تەمەكى ونىمدەرىنىڭ، ەلەكتروندى تۇتىنۋ جۇيەلەرىنىڭ (ۆەيپتار)، حوش يىستەندىرگىشتەر مەن ولارعا ارنالعان سۇيىقتىقتاردىڭ اينالىمى) قوسىلدى.