ءدال وسى الا دورباداعى قاپ-قاپ اقشا قالىڭ كوپشىلىكتىڭ جاعاسىن ۇستاتقان ەدى.
بىلتىر ءدال وسى ءساۋىر ايىندا تالدىقورعان ءبىلىم ءبولىمىنىڭ ەسەپشىسى الا سومكەلەرگە اقشانى تولتىرىپ، قاشىپ بارا جاتقان جەرىنەن ۇستالعانى ەل ەسىندە، دەپ حابارلايدى اlmaty-akshamy.kz. وسى ىسكە قاتىستى سوت وتىرىسى باستالدى. قالالىق ءبىلىم ءبولىمىنىڭ باس ەسەپشىسىنە جانە 20-عا جۋىق ءبىلىم مەكەمەسىنىڭ بۋحگالتەرلەرىنە 4،6 مرلد تەڭگەگە جۋىق قارجىنى جىمقىردى دەگەن ايىپ تاعىلىپ وتىر.
245 تومنان تۇراتىن ءىس جەتىسۋ وبلىستىق قىلمىستىق ىستەر بويىنشا اۋدانارالىق مامانداندىرىلعان سوتىندا قارالىپ جاتىر. بارلىعى 20 كۇدىكتى. جىمقىرىلعان قاراجات سوماسى 4 ملرد 570 ملن تەڭگەدەن اسادى. مەملەكەتتىك ايىپتاۋشىنىڭ ايىپتاۋ اكتىسىن تانىستىرۋعا 4 ساعاتتان استام ۋاقىتى كەتتى. ايتا كەتۋ كەرەك بۇعان دەيىنگى وتىرىستا پروكۋرور سوتتالۋشىلاردى ۇكىم شىققانشا قاماۋدا ۇستاۋ تۇرالى ۇسىنىس جولداعان بولاتىن. سوت ۇسىنىستى ءىشىنارا قاناعاتتاندىردى. قازىرگى تاڭدا 16 ادام قاماۋدا وتىر. قالعان 4 ازاماتشانىڭ ءبىرى زەينەت جاسىندا بولعاندىقتان، ەكى كۇدىكتى جۇكتىلىگى بويىنشا جانە بىرەۋى دەنساۋلىعىنا بايلانىستى ءۇيقاماقتا وتىر.
سايان دۇيسەبايەۆ، جەتىسۋ وبلىستىق پروكۋراتۋراسى 2ء-شى باسقارما باستىعىنىڭ ورىنباسارى:
ءبىلىم بەرۋ ءبولىمىنىڭ ورتالىقتاندىرىلعان بۋحگالتەرياسىنىڭ بۋحگالتەرلارى جانە مەكتەپ بۋحگالتەرلارىنا قاتىستى ۇيىمداسقان توپتى قۇرۋ جانە ۇيىمداسقان توپ قۇرامىنا قاتىسۋ، سونىمەن قاتار ۇيىمداسقان توپ قۇرامىندا بولىپ بيۋدجەت قاراجاتىن اسا ءىرى مولشەردە جىمقىرۋ باپتارىمەن ءىس قارالىپ جاتىر.
كوپشىلىكتىڭ جاعاسىن ۇستاتقان بۇل ءىستى تەرگەۋ وتكەن جىلى باستالعان بولاتىن. قالالىق ءبىلىم ءبولىمىنىڭ باس ەسەپشىسى اسا ءىرى كولەمدە قارجى جىمقىردى دەگەن كۇدىككە ءىلىنىپ پانفيلوۆ اۋدانىندا ۇستالعان. ءتىنتۋ بارىسىندا ەسەپشىدەن 1 ملرد تەڭگەگە جۋىق قولما-قول اقشا تابىلدى. مۇنان بولەك 20-دان استام جىلجىمايتىن مۇلىك پەن بىرنەشە كولىك جانە باعالى اشەكەيلەر تاركىلەندى. ءىس وتە اۋقىمدى بولعاندىقتان سوت وتىرىسى اپتاسىنا ءۇش رەت وتەتىن بولدى.