بۇل ۇيلەر تۇرعىندارعا «نۇرلى جەر» باعدارلاماسى اياسىندا دايىندالعان
تالدىقورعان قالاسىنىڭ اۋماعىندا 300-دەن استام ازامات 14 اپاتتى ۇيدە تۇرىپ جاتىر، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
اكىمدىكتىڭ مالىمەتىنشە، ەسكى ۇيلەر كيۆيليەۆ، شيەۆچەنكو، ابىلاي حان كوشەلەرى مەن جەتىسۋ شاعىن اۋماعىندا ورنالاسقان. كيۆيليەۆ كوشەسىنىڭ بويىندا 8 پاتەرلى 4 ءۇي ورنالاسقان. ونىڭ ىشىندە 29 پاتەردىڭ مەنشىك قۇقىعى بار. ال ۇشەۋى زاڭداستىرىلماعان. جەرگىلىكتى بيلىك تۇرعىنداردى كوشىرۋ ءۇشىن ازىرگە تەك 27 پاتەر ساتىپ الىنعانىن جەتكىزدى.
«بۇل ۇيلەر تۇرعىندارعا «نۇرلى جەر» باعدارلاماسى اياسىندا دايىندالعان «تالدىقورعان قالاسىنىڭ 2022-2025 جىلدارعا ارنالعان تۇرعىن ءۇي قورىن رەنوۆاسيالاۋ باعدارلاماسى» شەڭبەرىندە بەرىلەدى. ياعني بۇل باعدارلاما اپاتتى تۇرعىن ۇيلەردى ءسۇرىپ، ودان ازاماتتاردى كوشىرۋدى قاراستىرادى»، – دەدى تالدىقورعان قالاسىنىڭ اكىمى اسەت ماسابايەۆ.