ناۋرىزدا بارلىعى 117 مىڭ ادام ۇبت تاپسىردى.
ونىڭ ىشىندە تالاپكەرلەردىڭ 76،1 پايىزى قازاق تىلىندە، 23،8% پايىزى ورىس تىلىندە، 117 ادام اعىلشىن تىلىندە تەستىلەۋدەن ءوتتى، دەپ حابارلايدى اlmaty-akshamy.kz ۇلتتىق تەستىلەۋ ورتالىعىنا سىلتەمە جاساپ.
ۇبت باستالعالى شەكتى بالدى 75%-عا جۋىق تالاپكەر جينادى. ورتاشا بالعا كەلەتىن بولساق، ول 69 بالدى قۇرادى. ەڭ جوعارى بالل – 137. جالپى، 118 تالاپكەر 130-دان جوعارى بالل جينادى.
تەستكە قاتىسۋشىلاردىڭ باسىم بولىگى "بيولوگيا-حيميا" كومبيناسيالارىن تاڭداعان، اتاپ ايتقاندا، 19%-ى تاپسىردى. "ماتەماتيكا-فيزيكا" پاندەرىن 17% تاڭداعان. سونداي-اق، توپ-3 قاتارىنا تالاپكەرلەردىڭ 12% تاڭداعان "ماتەماتيكا-ينفورماتيكا" كومبيناسياسى كىردى. ەڭ از تاڭدالعان كومبيناسيا – "حيميا-فيزيكا"، ونى 121 ادام تاپسىرعان.
"2024 جىلعى قاڭتار ۇبت-سىنىڭ قورىتىندىسى بويىنشا تالاپكەرلەر "وقۋ ساۋاتتىلىعى" ءپانىن جوعارى دەڭگەيدە تاپسىردى. ورتاشا ەسەپپەن، سۇراقتاردىڭ 77%-ىنا دۇرىس جاۋاپ بەرىلگەن. ال "فيزيكانى" تاپسىرعان تالاپكەرلەردىڭ تەك 34% تاپسىرمانى دۇرىس ورىنداعان، ولار ءۇشىن "مەحانيكالىق تولقىندار" تاقىرىبى قيىن بولدى. وسىلايشا، ۇبت ناتيجەلەرى بويىنشا ۇلتتىق تەستىلەۋ ورتالىعى تەك ساندار ەمەس، سونىمەن قاتار تاقىرىپتار بويىنشا ەگجەي-تەگجەيلى تالداۋدى دا ۇسىنادى"، – دەلىنگەن ۇتو حابارلاماسىندا.
ۇبت وتكىزۋ بارىسىندا 127 ەرەجە بۇزۋشىلىق انىقتالعان. ونىڭ ىشىندە 71 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 51 ادام شىعارىلدى. بەينەجازبالارعا تالداۋ جۇرگىزۋ ناتيجەسىندە 5 ادامنىڭ ناتيجەسى جويىلدى. بوگدە تۇلعالار انىقتالعان جوق.