باتىس قازاقستان وبلىسىندا جولدى سۋ شايىپ كەتۋىنە بايلانىستى قاراتوبە، تەرەكتى جانە شىڭعىرلاۋ اۋدانىندا 10 ەلدى مەكەن كولىك بايلانىسىنسىز قالدى جانە وبلىستىق ماڭىزى بار 5 جول جابىلدى.
بقو پوليسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، وڭىردە 63 جولدى سۋ باسسا، سونىڭ ىشىندە بىرەۋى – رەسپۋبليكالىق، التاۋى – وبلىستىق، 17ء-سى – جەرگىلىكتى ماڭىزى بار اۆتوجولدار. بۇل جولداردا ستاسيونارلىق بەكەتتەر ورناتىلدى، دەپ حابارلايدى اlmaty-akshamy.kz.
«وبلىس بويىنشا سۋ تاسقىنىنان قورعاۋ جۇمىسىنا 703 پوليسيا قىزمەتكەرى 97 قىزمەتتىك تەحنيكامەن جۇمىلدىرىلدى. قازىرگى ۋاقىتتا پوليسيا قىزمەتكەرلەرى تۇرعىنداردى ءقاۋىپسىز جەرگە كوشىرۋدى جالعاستىرۋدا. اۋىلداردا 3 771 ادام كوشىرىلسە، سونىڭ 1 575ء-ى ەۆاكۋاسيالىق بەكەتكە ورنالاستىرىلىپ، 2 192ء-سى تۋىسقاندارىنا جىبەرىلدى. اتالعان بەكەتتەردى كۇزەتۋ جۇمىستارىنا 13 قىزمەتكەر بەلگىلەندى. ەۆاكۋاسيالانعان 49 اۋىل تۇرعىنىنان ۋاقىتشا ساقتاۋداعى 68 ازاماتتىق قارۋ تاركىلەندى. بارلىق قارۋ پوليسيا بولىمدەرىندە كۇزەتىلۋدە. سونداي-اق ادامدار كوشىرىلگەن ەلدى مەكەندەردە ازاماتتاردىڭ مۇلكىن قورعاۋعا 90 قىزمەتكەر (16 تەحنيكا) اتسالىسۋدا. سونىڭ ناتيجەسىندە بوتەننىڭ مۇلكىن ۇرلاۋ، توناۋ دەرەكتەرى تىركەلگەن جوق»، دەپ حابارلادى ۆەدومستۆودان.
«قازاۆتوجول» ۇك» اق بقو فيليالىنىڭ مالىمەتى بويىنشا تۇمانعا بايلانىستى 1 ءساۋىر كۇنى ساعات 21.45-تەن باستاپ رەسپۋبليكالىق ماڭىزى بار ورال-تاسقالا-رف شەكاراسى (4-104 كم) جانە ساعات 22.45-تەن باستاپ ورال-بۋزۋلۋك-رف شەكاراسى (5-33 كم) جولىندا بارلىق كولىك تۇرلەرى ءۇشىن شەكتەۋ ەنگىزىلدى.
