سوڭعى جىلدارى ناقتى سەكتورعا قاراعاندا، قىزمەت كورسەتۋ سالاسىندا جۇمىسپەن قامتىلعانداردىڭ سانى وسكەن.
مينيسترلىك باسشىلىعى تاكسي جۇرگىزۋشىلەر مەن كۋرەرلەردى الەۋمەتتىك قامسىزداندىرۋ جۇيەسىنە تارتۋ ءۇشىن ونلاين پلاتفورمالاردىڭ نەگىزگى وپەراتورلارىمەن كەزدەستى، دەپ حابارلايدى Almaty-akshamy.kz.
ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ونلاين پلاتفورمالاردا ىستەيتىن قازاقستاندىقتار الەۋمەتتىك قامسىزداندىرۋ جۇيەسىنە قوسىلاتىنىن مالىمدەدى.
ءمينيستردىڭ ايتۋىنشا، پاندەميا كەزىندەگى كارانتيندىك شەكتەۋلەر الەمدە جۇمىسپەن قامتۋدىڭ زامان تالابىنا بەيىم تاسىلدەرىن قولدانۋعا تىڭ سەرپىن بەردى. بۇل ۇردىستەن قازاقستان دا شەت قالعان جوق. بۇعان قوسا، ەل ەكونوميكاسىنا سيفرلاندىرۋ مەن جاڭا تەحنولوگيالار دا ءوز اسەرىن تيگىزۋدە. سوڭعى جىلدارى ناقتى سەكتورعا قاراعاندا، قىزمەت كورسەتۋ سالاسىندا جۇمىسپەن قامتىلعانداردىڭ سانى وسكەن.
«ساراپتامالىق مالىمەتتەرگە جۇگىنسەك، قازاقستاندا 500 مىڭداي ادام پلاتفورمالىق جۇمىسپەن قامتىلعان. ياعني، ازاماتتار ياندەكس، ۋبەر، ۆولت جانە گلوۆو سياقتى ءتۇرلى ونلاين-پلاتفورمالار ارقىلى جۇمىس ىستەيدى. مۇنداي رەجيم تۇرعىندارعا وتە ىڭعايلى ەكەنى ءسوزسىز. الايدا ونىڭ باستى كەمشىلىگى – جۇمىسپەن قامتىلعاندار ءۇشىن الەۋمەتتىك كەپىلدىكتىڭ جوقتىعى»، - دەدى دۇيسەنوۆا ۇكىمەت وتىرىسىندا.
ياعني ازامات جۇمىسسىز قالسا نەمەسە جۇكتىلىگىنە جانە بالالى بولۋىنا بايلانىستى جۇمىسىن توقتاتسا، مەملەكەتتىك الەۋمەتتىك ساقتاندىرۋ قورىنان قاجەتتى الەۋمەتتىك تولەم الا المايدى.
«وسىعان بايلانىستى بۇل ازاماتتاردى الەۋمەتتىك قامسىزداندىرۋ جۇيەسىنە تارتۋ ءۇشىن ونلاين پلاتفورمالاردىڭ نەگىزگى وپەراتورلارىمەن كەزدەستىك. ولارمەن بىرگە بيىلعى 1 شىلدەدەن باستاپ قامتۋ سحەمالارىن پيلوتتىق رەجيمدە جۇرگىزۋ تۋرالى شەشىم قابىلدادىق. جۇمىستىڭ ناتيجەسىن جىل سوڭىنا قاراي ۇسىنامىز»، - دەدى مينيستر.
مينيسترلىك پلاتفورمالىق جۇمىسپەن قامتۋدى تانىپ، ونى زاڭداستىرۋ ارقىلى ازاماتتارعا ىڭعايلى رەجيمدى ساقتاي وتىرىپ، ولاردىڭ ەڭبەك جانە الەۋمەتتىك قۇقىقتارىن قورعاۋدى كوزدەپ وتىر.