وتاندىق SCAT جانە Air Astana اۋە كومپانيالارى ادامداردى ەۆاكۋاسيالاۋ ءۇشىن دۋباي مەن دوحادان الماتى مەن استاناعا التى رەيس جاسايدى، دەپ حابارلايدى aqshamnews.kz
كولىك مينيسترلىگىنىڭ مالىمەتىنشە، تاياۋ شىعىسقا رەيستەر التى ەلدى (يران، يزرايل، يراك، يوردانيا، سيريا جانە ليۆان) اينالىپ ءوتۋ ارقىلى جۇزەگە اسىرىلۋدا.
"ماسەلەن، Air Astana 25 ماۋسىمنان باستاپ دۋبايدان الماتى مەن استاناعا، سونداي-اق دوحادان الماتىعا ۇشاتىن اۋە رەيستەرىن قايتا ىسكە قوستى. بۇگىنگى كۇنگە دەيىن شەگەرىلىپ كەلگەن رەيستەردىڭ جولاۋشىلارىن ەلگە قايتارۋ ءۇشىن قوسىمشا رەپاترياسيالىق رەيستەر دە ۇيىمداستىرىلادى."، دەلىنگەن قازاقستان رەسپۋبليكاسى كولىك مينيسترلىگىنىڭ حابارلاماسىندا.
"SCAT" اۋە كومپانياسى ازاماتتاردى كاتار ەلىنەن قازاقستانعا شىعارا باستادى. "دوحا-الماتى" رەيسى بۇگىن كاتار ۋاقىتىمەن ساعات 07:35-تە ورىندالدى. بورتتا 213 جولاۋشى بولدى.
سونداي-اق، بۇگىن "دوحا-استانا" رەيسى ورىندالادى. بورت دوحادان كاتاردىڭ جەرگىلىكتى ۋاقىتىمەن ساعات 14:30-دا ۇشادى دەپ جوسپارلانعان. جولاۋشىلاردىڭ سانى — 290 ادام.
ازاماتتاردى اكەتۋگە ارنالعان كەلەسى جوسپارلانعان چارتەرلىك رەيستەر:
27.06.25 دوحا-استانا
29.06.25 دوحا-الماتى
24 ماۋسىمدا يزرايل مەن يراننىڭ اتىستى توقتاتۋ تۋرالى كەلىسىمگە كەلگەنى بەلگىلى بولدى. كەيىن يزرايل ارمياسىنىڭ باس شتابىنىڭ باسشىسى ەييال زامير ءيزرايلدىڭ يرانعا قارسى اسكەري وپەراسياسى جالعاسىپ، جاڭا كەزەڭگە ءوتىپ جاتقانىن مالىمدەدى.