ششۋچە قالاسىنداعى جانار-جاعار ماي قۇيۋ بەكەتىندە بولعان شابۋىلدان كەيىن جەدەل جاردەم كولىگىنىڭ جۇرگىزۋشىسى بۋراباي كوپسالالى اۋدانارالىق اۋرۋحاناسىنىڭ قابىلداۋ بولمەسىنىڭ كومەگىنە جۇگىندى.
اقمولا وبلىسى دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، 10 اقپاندا ەكى فەلدشەر مەن جۇرگىزۋشىدەن تۇراتىن №2 جەدەل جاردەم بريگاداسى HYUNDAI سانيتارلىق كولىگىمەن ششۋچە قالاسىنداعى «گەليوس» جانار-جاعار ماي قۇيۋ بەكەتىنە بارعان.
جانار-جاعار ماي قۇيۋ كەزىندە جەدەل جاردەم كولىگىنىڭ جۇرگىزۋشىسى مەن رەسەيدە تىركەلگەن مەملەكەتتىك نومىردەگى «Toyota Land Cruiser 200» اۆتوكولىگىنىڭ جۇرگىزۋشىسى اراسىندا جانجال تۋىنداعان. سونىڭ سالدارىنان جەدەل جاردەم كولىگىنىڭ جۇرگىزۋشىسىنە دەنە جاراقاتى كەلتىرىلدى. وقيعادان كەيىن ول مەديسينالىق كومەك كورسەتۋ جانە ودان ءارى باقىلاۋ ءۇشىن بۋراباي كوپسالالى اۋدانارالىق اۋرۋحاناسىنىڭ قابىلداۋ بولمەسىنىڭ كومەگىنە جۇگىندى، - دەپ ءتۇسىندىردى باسقارمادان.
اقمولا وبلىسىنىڭ پوليسياسى شابۋىل جاساعان ازاماتتىڭ ۇستالعانىن مالىمدەدى.
اقمولا وبلىسىنىڭ پوليسيا دەپارتامەنتى ششۋچەدەگى جانار-جاعارماي قۇيۋ بەكەتىندە جەدەل جاردەم جۇرگىزۋشىسىنە دەنە جاراقاتىن سالعان ەر ادامدى انىقتادى. سوتقا دەيىنگى تەرگەۋ باستالىپ، كۇدىكتى ۋاقىتشا ۇستاۋ يزولياتورىنا قامالدى، – دەپ مالىمدەدى پوليسيا.