تاعى ءبىر قازاقستاندىق وتباسى ۇشەممەن تولىقتى

جاس وتباسىندا بىردەن ءۇش قىز بالا دۇنيەگە كەلدى

الماتى وبلىسىندا 26 جاستاعى جاس انا ۇشەم دۇنيەگە اكەلدى. سابيلەردىڭ ۇشەۋى دە - قىز بالا، دەپ حابارلايدى Almaty-akshamy.kz

ۇشەمدەردىڭ اناسى - كوكسۋ اۋدانىنىڭ تۇرعىنى ارداگۇل اسكەربەك. ول - تالدىقورعانداعى قوعامدىق-ساياسي «الاتاۋ» گازەتىنىڭ ءتىلشىسى. بۇل باسىلىمدى بەلگىلى ايتىسكەر اقىن ايتاقىن بۇلعاقوۆ باسقارادى. «26 جاستامىن.تۇڭعىشىم بەس جاستا. ءبىر قىزىم، ەكى ۇلىم بار. بۇگىن، مىنە، ۇشەمنىڭ اتا-اناسى اتانىپ، 6 بالالى بولدىق. ءتاۋبا، اللانىڭ قالاۋى. نەگىزى جولداسىم جاقتان دا، ءوزىم جاقتان دا تۇقىمىمىزدا ەگىز بار. ءبىراق ۇشەم جوق»، - دەيدى جۋرناليست، جاس بوسانعان انا ارداگۇل اسكەربەك.

ارداگۇل بۇگىن تالدىقورعان قالاسىنداعى وبلىستىق پەريناتالدىق ورتالىقتا تاڭەرتەڭ ساعات 10:10 شاماسىندا بوسانعان. «سابيلەرىمنىڭ جاعدايى جاقسى. سالماعى - 1900 گ، 1800 گ جانە 1700 گرامم. ءقازىر دارىگەرلەردىڭ باقىلاۋىندا»، - دەدى جاس انا. شاڭىراعى شاتتىققا بولەنىپ جاتقان جاس وتباسى اتا-اناسىمەن بىرگە تۇرادى.

ەستەرىڭىزگە سالا كەتەيىك، بۇگىن ەلىمىزدە تاعى ءبىر وتباسىندا ۇشەم دۇنيەگە كەلگەنىن حابارلاعان بولاتىنبىز.