بۇگىندە قازاقستان نارىعىنا شەتەلدىك اۋە كومپانيالاردى تارتۋ ءۇشىن كەلىسسوز جۇرگىزىلىپ جاتىر.
بۇل تۋرالى كولىك ءمينيسترى مارات قارابايەۆ ايتتى، - دەپ حابارلايدى اlmaty-akshamy.kz Massaget.kz-كە سىلتەمە جاساپ.
بۇگىن ءماجىلىستىڭ جالپى وتىرىسىندا دەپۋتات ايدوس سارىم ۇشاق بيلەتتەرى وتە قىمبات ەكەنىن ايتىپ، ونى تومەندەتۋ ءۇشىن قانداي جۇمىستار جۇرگىزىلەتىنىن سۇرادى.
ونىڭ پىكىرىنشە، تۇتىنۋشىلار مەن ساراپشىلار اۋە تاسىمالى باعاسىنىڭ جوعارى ماسەلەسىن ۇنەمى كوتەرىپ ءجۇر.
«بۇل تۋرالى تالاي دەپۋتاتتىق ساۋال جولداندى. ادامدار تومەن بيۋدجەتتى اۋە كومپانياسىنىڭ بيلەت باعاسىنىڭ كۇن سايىن قىمباتتاپ بارا جاتقانىن ايتادى. Air Astana اۋە كومپانياسىنىڭ ەنشىلەسى Fly Arystan جولاۋشىلاردى قولجەتىمدى باعامەن قامتۋ ءۇشىن قۇرىلعان ەدى. سونداي-اق ول ىشكى ءتۋريزمدى دامىتۋعا نەگىزدەلگەن بولاتىن. ال ءىس جۇزىندە لوۋكەستەر بيلەتتەرىنىڭ باعاسى باس كومپانيامەن باعاسىمەن تەڭەسىپ، جىلدان جىلعا ءوسىپ جاتىر. مۇنداي باعا ماسقارا ەمەس پە؟ كولىك مينيسترلىگى بولاشاقتا ازاماتتارىمىز اۋە بيلەتتەرىن قولجەتىمدى باعامەن ساتىپ الۋ ءۇشىن قانداي شارالار قاراستىرادى؟» – دەدى دەپۋتات.
مينيستر مارات قارابايەۆ ماسەلەنى شەشۋ ءۇشىن نارىقتاعى باسەكەلەستىكتى كۇشەيتۋ كەرەكتىگىن جەتكىزدى.
«2020-2021 جىلدارمەن سالىستىرعاندا اۋە تاسىمالىنا سۇرانىس 17%-عا ءوستى. بيىل ول 26%-عا ارتتى. جالپى سۇرانىس ارتىپ جاتىر، ال ۇسىنىس وعان توتەپ بەرە الماۋدا. ول ءۇشىن ۇشاقتاردىڭ سانىن ۇلعايتۋ قاجەت. بىلتىر 14 ۇشاق ساتىپ الىندى. بيىل جىل سوڭىنا دەيىن اۋە كومپانيالارى تاعى 11 ۇشاق ساتىپ الادى. ناتيجەسىندە قازاقستاندىق ۇشاقتاردى سانى جۇزگە جەتەدى جانە ونداعى ورىندىقتاردىڭ سانى 12 مىڭنان 15 مىڭعا ارتادى، تاعى 3 مىڭ ورىن قوسىلادى. وعان قوسا 2024-2025 جىلدارى تاعى 14 ۇشاق ساتىپ الۋ جوسپارلانىپ وتىر. سونداي-اق باسەكەلەستىكتى دە دامىتۋ كەرەك. Air Astana اۋە كومپانياسى Fly Arystan-دى جەكە شىعارىپ جاتىر. ناتيجەسىندە 4 اۋە كومپانياسى بولادى، وسىلايشا باسەكەلەستىك ارتادى. وعان قوسا ءبىز شەتەلدىك اۋە كومپانياسىن نارىققا تارتىپ. ونى بەسىنشى كومپانيا رەتىندە دامىتۋ جوسپاردا بار»، - دەدى ۆەدومستۆو باسشىسى.
ءماجىلىس وتىرىسىنان سوڭ مارات قارابايەۆ قازاقستان نارىعىندا قانداي شەتەلدىك كومپانيا جۇمىس ىستەيتىنىنە قاتىستى تۇسىنىك بەردى.
«Qazaq Air اۋە كومپانياسىن ساتامىز دەگەن وي بار. ءبىز ونى بىرنەشە كومپانياعا ۇسىندىق. ونىڭ ىشىندە ۆەتنامنىڭ Sovico كومپانياسى بار. ونىمەن كوبىرەك جۇمىس ىستەپ جاتىرمىز. ولار قازاقستاننىڭ ىشكى نارىعىن زەرتتەۋدە. سونىمەن قاتار VietJet Air كومپانياسى بار. ول قازاقستاندا ۇشىپ ءجۇر. ول دا لوۋكوستەر. كومپانيانىڭ ۇشاقتارى وتە كوپ. سونى نارىققا تارتامىز دەگەن وي بار. ءبىراق بۇل ماسەلە ءقازىر شەشىلمەيدى»، - دەدى ول.