جۋرناليستيكا سالاسىنداعى ولجاس سۇلەيمەنوۆ اتىنداعى حالىقارالىق سىيلىق يەگەرلەرى بەلگىلى بولدى.
قازاقستان جۋرناليستەر وداعىنىڭ كەڭسەسىندە بۇقارالىق اقپارات قۇرالدارى قىزمەتكەرلەرى كۇنىنە ارنالعان باسپا ءسوز كونفەرەنسياسى ءوتتى. وعان بەلگىلى قوعام قايراتكەرلەرى ولجاس سۇلەيمەنوۆ پەن مۇرات اۋەزوۆ، قازاقستان جۋرناليستيكا اكادەمياسىنىڭ پرەزيدەنتى ساعىمباي قوزىبايەۆ، قازاقستان جۋرناليستەر وداعى باسقارماسىنىڭ ءتوراعاسى سەيىتقازى ماتايەۆ قاتىستى.
كەزدەسۋ ولجاس ومار ۇلىنىڭ 85 جىلدىق مەرەيتويىنا ارنالعان «ءوز جەرىنىڭ ەلشىسى» كىتابىنىڭ تۇساۋكەسەرىنەن باستالدى. كىتاپتى قازاقستان جۋرناليستيكا اكادەمياسىنىڭ ۆيسە-پرەزيدەنتى ۆالەريي جانداۋلەتوۆ تانىستىردى. سودان كەيىن جۋرناليستيكا سالاسىنداعى ولجاس سۇلەيمەنوۆ اتىنداعى حالىقارالىق سىيلىققا بەلگىلى مادەنيەتتانۋشى مۇرات اۋەزوۆ جانە قازاقستان جۋرناليستيكاسىنىڭ ارداگەرى تىلەۋجان ەسىلبايەۆ يە بولدى. جۋرناليستەر وداعىنىڭ باسشىسى شىعارماشىلىق وداقتىڭ ماراپاتتارىن جاريالادى.
بيىل ولجاس ومار ۇلى باسقارعان «نيەۆادا-سەمەي» قوعامدىق-ساياسي ۇيىمىنىڭ قۇرىلعانىنا 32 جىل تولدى. 29 تامىز حالىقارالىق يادرولىق قارۋعا قارسى كۇرەس كۇنى بولىپ بەكىتىلىپ، قازاقستاننىڭ تولىقتاي يادرولىق قارۋدان باس تارتقانىنا 30 جىل تولدى. وسىعان وراي جۋرناليستەرگە ارنايى ماراپات تابىستالدى. ماراپاتتالعان جۋرناليستەردىڭ ءبىرى – «اlatay Aqparat» ءجشس-نىڭ باس ديرەكتورى تولەمىس باقتىباي ۇلى كۇلمۇحامەدوۆ.
مۇرات اۋەزوۆ،
جازۋشى، مەملەكەت جانە قوعام قايراتكەرى:
ولجاس سۇلەيمەنوۆ اتىنداعى حالىقارالىق سىيلىققا ول كىسىنىڭ ءوز قولىنان يە بولۋ مەن ءۇشىن ۇلكەن بەدەل، قۇرمەت. تەك مەن عانا ەمەس، ءبىزدىڭ بۋىن وكىلدەرىنىڭ، جالپى قازاقتىڭ رۋحىن كوتەرىپ، مارتەبەسىن بيىكتەتكەن ولجاس سۇلەيمەنوۆتىڭ ولەڭدەرى مەن زەرتتەۋ ەڭبەكتەرى دەپ بىلەمىن. «قولدا باردا التىننىڭ ءقادىرى» جوق دەگەن ءسوز بار. ولجاس سۇلەيمەنوۆتەي ازاماتتىڭ ەل ءۇشىن سىڭىرگەن ەڭبەگى كوزى تىرىسىندە ەلەنۋ كەرەك. ولجاستاي ازاماتتى قازاققا بۇيىرتقان ول – تاعدىردىڭ جومارتتىعى.
ساعىمباي قوزىبايەۆ،
قازاقستان جۋرناليستيكا اكادەمياسىنىڭ پرەزيدەنتى:
- بۇگىنگى قازاقستان جۋرناليستەر وداعىنىڭ جانە قازاقستان جۋرناليستەر اكادەمياسىنىڭ سىيلىقتارىن تابىستاۋ بۇقارالىق اقپارات قۇرالدارى قىزمەتكەرلەرىنىڭ كۇنىنە وراي ۇيىمداستىرىلدى. جۋرناليستەر اكادەمياسىنا بيىل ءدال وسى كۇنى 20 جىل. بەلگىلى «التىن جۇلدىز»، «التىن سامۇرىق»، «اققۋ» اتتى ماراپاتتارعا قوسا ولجاس ومار ۇلىنىڭ 85 جىلدىعىنا بايلانىستى تاعى دا ءبىر سىيلىقتى ۇسىنىپ وتىرمىز. ول – پۋبليسيستيكا سالاسىنداعى ولجاس سۇيلەيمەنوۆ اتىنداعى حالىقارالىق سىيلىق. سىيلىقتىڭ ەڭ العاشقى يەگەرلەرىنە ونى ولجاس سۇلەيمەنوۆتىڭ ءوزى تابىس ەتتى.