مەگاپوليستىڭ مەديسينالىق مەكەمەلەرى پاندەميانىڭ ءۇش كەزەڭىنە دە دايىن.
بۇگىندە الماتىدا كوۆيدتىك اۋرۋحانالاردا 700-گە جۋىق ادام ەمدەلۋدە. وڭىرلىك كوممۋنيكاسيالار قىزمەتى الاڭىندا وتكەن باسپا ءسوز كونفەرەنسياسى بارىسىندا الماتى قالاسى قوعامدىق دەنساۋلىق باسقارماسىنىڭ باسشىسى ناريمان تابىنبايەۆ ەپيدەميالىق احۋال ناشارلاسا، وندا قالادا 10 مىڭعا دەيىن ۇلعايتۋ مۇمكىندىگىمەن 4 مىڭعا جۋىق توسەك-ورىن دايىندالعانىن جەتكىزدى، دەپ حابارلايدى Almaty-akshamy.kz.
ناريمان تابىنبايەۆتىڭ ايتۋىنشا، وتكەن تاۋلىكتە الماتىدا كوروناۆيرۋستىق ينفەكسيانىڭ 215 جاعدايى تىركەلگەن. ولاردىڭ بارلىعى جەرگىلىكتى تۇرعىندار، ال 186 تۇرعىندا اۋرۋ بەلگىلەرى بار، قالعاندارى سيمپتومسىز. بۇگىندە دارىگەرلەردىڭ باقىلاۋىندا 1 196 ناۋقاس بار.
ونىڭ مالىەتىنشە، مەگاپوليستىڭ مەديسينالىق مەكەمەلەرى پاندەميانىڭ ءۇش كەزەڭىنە دە دايىن. قالادا دەنساۋلىق ساقتاۋ جۇيەسىنىڭ رەزەرۆتەرى قىزمەت اتقارادى، ستاسيونارلاردا ناۋقاستاردىڭ شامادان تىس تولۋى بولمايدى.
«ءبىز ىندەتپەن كۇرەسۋگە دايىنبىز. جۇيەنىڭ قۋاتى جەتكىلىكتى. 4 600-دەن استام مەديسينا قىزمەتكەرى كوۆيدتىك اۋرۋحاناعا جۇمىسقا شىعۋعا دايىن، ءتۇرلى جاعداي كەزىندە 200-دەن استام جەدەل مەديسينالىق جاردەم بريگاداسى جۇمىس ىستەيدى. مىسالى، بۇگىندە ستاسيونارلاردا 3 700 توسەك-ورىندى، قولايسىز جاعدايدا 6 000 توسەك-ورىندى، وتە قولايسىز جاعدايدا 10 000 توسەك-ورىندى ورنالاستىرۋعا دايىنبىز»، - دەدى ناريمان تابىنبايەۆ.
بۇدان وزگە، ەگەر جاعداي ۋشىعاتىن بولسا، وندا ءموبيلدى بريگادالار سانى ەكى ەسەگە ارتاتىن بولادى. سونداي-اق CALL-ورتالىقتارىنىڭ وپەراتورلارىنىڭ سانىن ەكى ەسەگە ارتتىرۋ جوسپارلانىپ وتىر. قدب-نىڭ باسشىسى ۆەدومستۆونىڭ كوروناۆيرۋسقا قارسى كۇرەستى توقتاتپاعانىن اتاپ ءوتتى. اۋرۋحانالار مەن ەمحانالار دارى-دارمەكتەرمەن جانە مەديسينالىق تەحنيكامەن جەتكىلىكتى كولەمدە جابدىقتالعان.
اۋرۋحانالار مەن ستاسيونارلاردىڭ شامادان تىس جۇكتەلۋىنە جول بەرمەۋ ءۇشىن قدب باسشىسى حالىقتى ۆاكسينالانۋعا شاقىردى. ناريمان تابىنبايەۆتىڭ ايتۋىنشا، بۇگىندە 428 532 ادام ەكپە الدى. 60 جاستان جوعارى ەكپە العان ادامدار 69 644 ادامدى قۇرايدى. ۆاكسينا ناۋقانى جالعاسۋدا. ۆاكسينانى قالانىڭ 208 ەكپە پۋنكتىنىڭ بىرىنەن الۋعا بولادى.