الەمنىڭ كوپتەگەن ەلدەرىنىڭ حالقى وزدەرىن كوروناۆيرۋستىڭ جاڭا شتامىنان وقشاۋلاسا، ال الماتى تۇرعىندارى، اسىرەسە، جاستار كارانتين شارالارىن كۇن سايىن بۇزىپ كەلەدى. مەگاپوليستىڭ باس سانيتارلىق دارىگەرى جانداربەك بەكشين وڭىرلىك كوممۋنيكاسيالار قىزمەتى الاڭىندا وتكەن بريفينگتە جاستاردىڭ ۆاكسينانى ەلەمەي، كۆي تارالۋ ماسەلەسىنە ەنجار قارايتىندىقتارىن ايتتى.
جۋرناليستەردىڭ سۇراقتارىنا جاۋاپ بەرە كەلىپ، جانداربەك بەكشين سوڭعى ەپيدەميولوگيالىق تەكسەرۋ بارىسىندا ناۋقاستارمەن بايلانىستا بولۋ سالدارىنان ازاماتتاردىڭ كوروناۆيرۋس جۇقتىرۋىنىڭ 86% جاعدايىنىڭ تىركەلگەنىن ايتتى.
"ولار وتباسىندا، ساۋدا نىساندارىندا، كوپشىلىك ءىس-شارالاردا، مەرەيتوي مەن ەسكە الۋ كەشتەرىندە، قوعامدىق كولىكتە ىندەت جۇقتىرۋدا"، – دەدى باس سانيتارلىق دارىگەر.
ج. بەكشيننىڭ ايتۋىنشا، جاڭا شتامداردىڭ تارالۋ ءقاۋپى جوعارى. «سوندىقتان الماتىداعى ەپيدەميولوگيالىق جاعداي كۇردەلى. قالادا كوروناۆيرۋس اۋرۋىنىڭ جوعارى تارالۋى جاستاردىڭ ۆاكسيناعا نەمقۇرايلى قاراۋىنان ءارى كارانتيندىك شارالاردىڭ بۇزىلۋىنان»، - دەدى باس سانيتارلىق دارىگەر.
"نەگىزىنەن 20 - 40 جاستاعى ازاماتتار دەرتتى تەز جۇقتىرادى. ءقازىر وسى جاس ارالىعىندا دەرت جۇقتىرعاندار 38%-دى قۇرايدى. بۇگىندە ىندەت جۇقتىرۋ ءقاۋپى 5% ءوسىمدى كورسەتسە، بۇل جاستاردىڭ ۆاكسينانى ەلەمەۋىندە. جاستار قارت ادامدار سياقتى كوروناۆيرۋستىڭ جاڭا شتامىمەن ينفەكسياعا جانە اۋرۋعا بەيىم ەكەنىن ەسكەرگەن ءجون"، – دەدى ج. بەكشين.
ۆيرۋستىڭ نەگىزگى تاسىمالداۋشىسى – بەلسەندى جاستار. مىسالى، مونيتورينگتىك توپتار دەمالىس كۇندەرى بەلگىلەنگەن شەكتەۋلەردىڭ ونداعان بۇزۋشىلىقتارىن تىركەدى. تۇنگى ۋاقىتتا بىرنەشە ويىن-ساۋىق مەكەمەلەرى انىقتالدى. وندا ادامدار الەۋمەتتىك قاشىقتىق پەن جۇمىس رەجيمىن ساقتامادى.
ج. بەكشيننىڭ ايتۋىنشا، 40 پەن 60 جاس ارالىعىنداعى حالىق بەلسەندى تۇردە ۆاكسينا الدى، بۇل وسى توپتىڭ جۇقتىرۋ جاعدايلارىنىڭ 5%-عا تومەندەگەنىن كورسەتتى.
60 جاستان اسقان ادامدار ەرىكتى تۇردە ۆاكسينا الدى، سوندىقتان اۋرۋدىڭ تەك 20%-ى تىركەلگەن.
ەپيدەميولوگيالىق تالاپتاردى ساقتاماۋ سالدارىنان الماتىدا 14 جاسقا دەيىنگى بالالاردىڭ جۇقتىرۋ ءقاۋپىنىڭ جوعارى ەكەنى بايقالدى، ولاردىڭ اراسىندا دەرت 12%-دان 15%-عا دەيىن ارتتى. ج.بەكشيننىڭ پىكىرىنشە، بۇل - سOVID-19 "دەلتا" شتامىنىڭ ەرەكشەلىگى.