وڭتۇستىك كورەيا رەسپۋبليكاسىنا جۇمىس ىستەۋگە كەتكەن وتانداستارىمىزدىڭ شەت ەلدەگى حال-احۋالى قانداي؟ شەكارادا قاشىپ، ۇستالعان ەكى جىگىتتىڭ وقيعاسى سول جاقتا جۇمىس ىستەپ جۇرگەن باسقا ازاماتتارعا قالاي اسەر ەتتى؟ كورەيا ەلىندە بەس جىلدان استام ۋاقىت ءناپاقا تاۋىپ جۇرگەن قازاق قىزىمەن Massaget.kz ءتىلشىسى سۇحباتتاسقان.
الماتى قالاسىنىڭ تۋماسى قىدىربايەۆا سابينا كۋدياروۆنا 2018 جىلى كورەي رەسپۋبليكاسىنا جۇمىس ىستەۋگە بارعان. ول ۋاقىتتا ەشقانداي ۆيزا تالاپ ەتىلمەگەنىن ايتادى.
«مەن ءوزىم 2018 جىلى ماۋسىمدا كورەياعا كەلدىم. سول جىلدارى ك-ەتا تاپسىرۋ (كورەيانىڭ ساياحاتقا ەلەكتروندى رۇقساتى)، ارنايى قۇجات جيناۋ بولمادى. تەك بەكەتتەن وتكەن كەزدە قۇجاتتارىمدى تەكسەردى. ەلدە جۇرگەندە ەشقانداي جۇمىس ىزدەگەن جوقپىن. وسى جاقتا ءبىزدى قازاق باۋىرلارىمىز كۇتىپ الىپ، جۇمىسقا ورنالاستىردى» ، - دەيدى سابينا قىدىربايەۆا.
كورەياداعى العاشقى تابىسىم 500 مىڭ تەڭگە
كورەيانىڭ (Gwangju) كۆاندجۋ قالاسىندا تۇراتىن ول ءقازىر كولىك شىعاراتىن زاۋىتتا قىزمەت اتقارادى.
«مەنىڭ ەڭ ءبىرىنشى جۇمىسىم تاماق ىشەتىن ورىنداردا ىدىس-اياق جۋۋ بولدى. ول كەزدەگى تابىسىم ايىنا 1 ميلليون 500 مىڭ ۆون ياعني 500 مىڭ تەڭگە بولاتىن. كەيىننەن قوناقۇيدە جۇمىس ىستەدىم. سوسىن ءتىل ۇيرەنىپ، زاۋىتقا جۇمىسقا ورنالاستىم. ءقازىر كولىك شىعاراتىن زاۋىتتا جارىقشامدار (فارا – ەسك.) شىعارامىز. جۇمىس ۋاقىتى تاڭعى 08:00- دەن كەشكى 20:00- گە دەيىن. تۇسكى جانە كەشكى ءۇزىلىستى ەسەپتەگەندە 10،5 ساعات جۇمىس ىستەيمىز. قازىرگى ايلىعىم 1 ميلليون تەڭگەدەن جوعارى»، - دەيدى ول.
جۇمىسشىلارعا ەرەكشە جاعداي جاسالعان
«بۇل ەلدە جۇمىس بەرۋشىلەر جول اقىسىمەن، تۇسكى جانە كەشكى اسپەن قامتاماسىز ەتەدى. ال ءدامحانا نەمەسە قوناقۇيلەردە جۇمىس ىستەسەڭىز وندا ارنايى پاتەر بەرىلەدى. جالعا بەرىلەتىن ۇيلەر، كوممۋنالدىق قىزمەتتى قوسقاندا ايىنا 134 مىڭ تەڭگە شىعادى»، - دەيدى كورەياداعى قازاق قىزى.
بۇل جاعداي كورەياداعى قازاقتارعا دا اسەر ەتتى
«كورەيادا جۇرگەن قازاقتاردىڭ سانى وتە كوپ. ءبىراق 80%-ى وسىندا جۇمىس ءۇشىن كەلگەن. ءتىپتى وتباسىمەن كەلىپ، وسى جەردە ۆيزاعا تاپسىرىپ، بالالارىن كورەي مەكتەپتەرىندە وقىتىپ جۇرگەندەر بار. «ەكى ازامات بەكەتتەن قاشىپ كەتتى»، دەگەن جاڭالىقتان سوڭ كورەي حالقىنىڭ بىزگە دەگەن كوزقاراستارى وزگەردى. ولارعا جۇرت تەرروريست رەتىندە قارايدى سوندىقتان قازاق ازاماتتارىن جۇمىس ورنىنان شىعارىپ جىبەرگەندەر دە بولدى»، - دەيدى ول.
ەلگە قايتپاۋدىڭ باستى سەبەبى – اقشا
«قازاقستاندا جالاقى 200-300 مىڭ تەڭگە ودان كوپ جۇمىسشىعا تولەمەيدى. ءبىز مىنا جاقتا جاقسى ايلىق الامىز. سول سەبەپتى ەلگە قايتقىمىز جوق. كورەيا ءبىزدى ءوزىنىڭ ايلىعى جانە قاۋىپسىزدىگىمەن باۋراپ الدى»، - دەيدى سابينا.
ۇلتتىق تاعامدى ساعىنساق، وزبەك اسحاناسىنا بارامىز
سوڭعى بەس جىلىن وزگە ەلدە وتكىزگەن سابينا كۋدياروۆنا ەلدى ساعىنعانىن ايتادى. دەگەنمەن تۋعان جەرگە ورالۋ ءالى جوسپارىندا جوق.
ۇلتتىق اسىمىزدى ساعىنساق وزبەكستان ازاماتتارىنىڭ اشىپ قويعان ارنايى تاماقتاناتىن ورىندارىنا بارامىز - دەيدى ول.
ودان وزگە كورەياداعى ەل ازاماتتارى مەرەكە كۇندەرى باس قوسىپ، ارنايى كەش وتكىزىپ تۇرادى ەكەن.