ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى ولجاس انافين ۇكىمەتتە وتكەن باسپا ءسوز كونفەرەنسياسىندا تابىسى از قازاقستاندىقتارعا كورسەتىلەتىن مەملەكەتتىك الەۋمەتتىك قولداۋ شارالارى تۋرالى ايتتى. مۇنداي ساناتتاعى ازاماتتارعا كوممۋنالدىق قىزمەتتەردى وتەۋگە تۇرعىن ءۇي جانە الەۋمەتتىك كومەك پەن وتباسىن قيىن ومىرلىك جاعدايدان شىعارۋعا باعىتتالعان اتاۋلى الەۋمەتتىك كومەك كورسەتىلەدى.
تۇرعىن ءۇي كومەگى كوممۋنالدىق قىزمەتتەردى تولەۋگە، تۇرعىن ءۇيدى كۇتىپ ۇستاۋعا ارنالعان شىعىستارى جەرگىلىكتى وكىلدى ورگاندار بەلگىلەگەن وسى ماقساتتارعا ارنالعان شىعىستاردىڭ رۇقسات ەتىلگەن شەكتى ۇلەسىنەن اساتىن ازاماتتارعا كورسەتىلەدى. شەكتى رۇقسات ەتىلگەن ۇلەستىڭ مولشەرى 10%-دان اسپايدى.
كومەكتىڭ بۇل ءتۇرى تەك ءبىر تۇرعىن ءۇيى بولعان جاعدايدا جەرگىلىكتى بيۋدجەت قاراجاتى ەسەبىنەن الەۋمەتتىك مارتەبەسىنە قاراماستان ۇسىنىلادى.
تۇرعىن ءۇي كومەگىن كورسەتۋگە ءوتىنىشتى ەلەكتروندىق ۇكىمەت پورتالى (egov.kz) نەمەسە حالىققا قىزمەت كورسەتۋ ورتالىقتارى ارقىلى بەرۋگە بولادى.
«2024 جىلى جەرگىلىكتى اتقارۋشى ورگاندار جالپى سوماسى 592 ملن تەڭگەگە 17،5 مىڭ وتباسىنا نەمەسە 41،2 مىڭ ادامعا تۇرعىن ءۇي كومەگىن كورسەتتى. وسى جىلى جەرگىلىكتى بيۋدجەتتەردەن تۇرعىن ءۇي كومەگىن تولەۋ ءۇشىن 41،9 مىڭ الۋشىعا 1،5 ملرد تەڭگە قاراستىرىلعان»، – دەدى ولجاس انافين.
قوسىمشا كوممۋنالدىق قىزمەتتەرگە اقى تولەۋگە جانە جەرگىلىكتى بيۋدجەتتەردەن قاتتى وتىن ساتىپ الۋعا ازاماتتاردىڭ جەكەلەگەن ساناتتارىنا ءبىرجولعى جانە اي سايىن الەۋمەتتىك تولەمدەر ۇسىنىلادى. الۋشىلار ساناتتارىنىڭ تىزبەسىن، الەۋمەتتىك كومەكتىڭ شەكتى مولشەرىن جانە وعان جۇگىنۋ مەرزىمدەرىن جەرگىلىكتى اتقارۋشى ورگاندار بەلگىلەيدى جانە جەرگىلىكتى وكىلدى ورگانداردىڭ شەشىمدەرىمەن بەكىتىلەدى.
«بۇل تولەمدەر بارلىق وڭىرلەردە قاراستىرىلماعان جانە ول جەرگىلىكتى بيۋدجەتتەردىڭ مۇمكىندىكتەرىنە بايلانىستى بولادى. 2024 جىلى بۇل ماقساتتارعا 181،2 مىڭ الۋشى ءۇشىن 5،3 ملرد تەڭگە باعىتتالدى. جەرگىلىكتى اتقارۋشى ورگانداردىڭ دەرەكتەرى بويىنشا 2025 جىلى ازاماتتاردىڭ جەكەلەگەن ساناتتارىنا الەۋمەتتىك كومەك تولەۋگە 193،7 مىڭ الۋشى ءۇشىن 2،6 ملرد تەڭگە قاراستىرىلعان.
بەلگىلەنگەن كريتەرييلەرگە سايكەس ازامات ءبىر مەزگىلدە تۇرعىن ءۇي كومەگى مەن الەۋمەتتىك تولەم الا الاتىنىن اتاپ ءوتۋ ماڭىزدى»، – دەدى ولجاس انافين.
جان باسىنا شاققانداعى ورتاشا تابىسى كەدەيلىك شەگىنەن تومەن (وڭىرلىك مەدياندىق كىرىستىڭ 35%-ى، ءبىراق وڭىرلىك ەڭ تومەن كۇنكورىس دەڭگەيىنىڭ 70%-نان كەم ەمەس) تابىسى از وتباسىلار ءۇشىن اتاۋلى الەۋمەتتىك كومەك (بۇدان ءارى – ااك) كورسەتىلەدى.
«تاريفتەر كوتەرىلگەن كەزدە باعانىڭ ءوسۋى ەڭ تومەنگى كۇنكورىس دەڭگەيىنىڭ ازىق-تۇلىك ەمەس بولىگىنە (55% ازىق-تۇلىك، 45% ازىق-تۇلىك ەمەس بولىگى) اسەر ەتەدى. وسىلايشا، كوممۋنالدىق قىزمەتتەر قۇنىنىڭ ءوسۋى كۇنكورىس دەڭگەيىنىڭ جوعارىلاۋىنا جانە سايكەسىنشە ااك مولشەرىنە اسەر ەتەتىن كەدەيلىك شەگىنىڭ وزگەرۋىنە اكەلەدى.
ەڭبەك جانە حالىقتى الەۋمەتتىك قورعاۋ مينيسترلىگى بۇل وزگەرىستەرگە دايىن. تابىسى كەدەيلىك شەگىنەن تومەن بارلىق قازاقستاندىقتارعا اتاۋلى الەۋمەتتىك كومەك كورسەتىلەتىن بولادى. 2024 جىلى ااك تولەۋگە 78،1 مىڭ وتباسىنىڭ 413،7 مىڭ مۇشەسى ءۇشىن 39،5 ملرد تەڭگە جۇمسالسا، بيىل بۇل ماقساتتارعا 1 ملن ادامعا 132،9 ملرد تەڭگە قاراستىرىلعان»، – دەپ اتاپ ءوتتى ولجاس انافين.
بۇرىن حابارلانعانداي، ااك-تىڭ نەگىزگى ماقساتى – اقشالاي تولەمدەر تۇرىندە قولداۋدى جۇزەگە اسىرۋ جانە وتباسىنىڭ ەڭبەككە قابىلەتتى مۇشەلەرىن جۇمىسپەن قامتۋعا جاردەمدەسۋدىڭ بەلسەندى شارالارىنا تارتۋ ارقىلى وتباسىن ومىرلىك قيىن جاعدايدان شىعارۋ.
ااك مىنالاردى كوزدەيدى:
- تابىسى كەدەيلىك شەگىنەن اسپايتىن ازاماتتارعا توقسان سايىن الەۋمەتتىك كومەك تاعايىنداۋ؛
- ءبىر جاستان باستاپ التى جاستاعى بالالارى بار تابىسى از وتباسىلاردىڭ ءار بالاسىنا 1،5 اەك مولشەرىندە اي سايىنعى قوسىمشا تولەم بەرۋ؛
- جۇمىسقا ورنالاسۋ، ءوز ءىسىن اشۋعا نيەتتى وتباسىلارعا گرانتتار بەرۋ، بىلىكتىلىكتى ارتتىرۋ كۋرستارىنا جىبەرۋ (قاجەت بولعان جاعدايدا) جانە ت. ب. ارقىلى جۇمىسپەن قامتۋعا جاردەمدەسۋ.
قازىرگى ۋاقىتتا قازاقستاندىقتار ااك تاعايىنداۋعا ءوتىنىشتى مانساپ ورتالىعىنا، تۇرعىلىقتى جەرى بويىنشا اۋىلدىق وكرۋگ اكىمىنە نەمەسە ەلەكتروندىق ۇكىمەت پورتالى (egov.kz) ارقىلى بەرە الادى.