باس جۇلدە يەگەرىنە 1 ميلليون تەڭگە تابىستالدى
اقتوبەدە تابىلدى دوسىموۆتىڭ شىعارماشىلىعىنا ارنالعان ءان بايقاۋى ءوتىپ، ماڭعىستاۋلىق ايگۇل قۇباش باس جۇلدە جەڭىپ الدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقتان شىققان تۇڭعىش بارد اقىن تابىلدى دوسىموۆتىڭ شىعارماشىلىعىنا ارنالعان «سايگۇلىك» اتتى ءان بايقاۋىنا بارلىعى 14 ونەرپاز قاتىستى.
ال ونەر دوداسىندا كومپوزيتور، ءانشى، قازاقستاننىڭ ەڭبەك سىڭىرگەن قايراتكەرى ەلەنا ءابدىحالىقوۆا، كومپوزيتور، ت.دوسىموۆتىڭ شاكىرتى، قازاقستاننىڭ مادەنيەت سالاسىنىڭ ۇزدىگى ەسەنباي قۇلي، ءانشى، ۇستاز، قازاقستاننىڭ ەڭبەك سىڭىرگەن قايراتكەرى، «ەرەن ەڭبەگى ءۇشىن» مەدالىنىڭ يەگەرى مارات ءايتىموۆ، ت.دوسىموۆ اتىنداعى رەسپۋبليكالىق قوعامدىق قوردىڭ ديرەكتورى، اقىن بيجان قالماعانبەتوۆ قازىلىق ەتتى.
باس جۇلدەنى ماڭعىستاۋلىق ايگۇل قۇباش جەڭىپ الىپ، 1 ميلليون تەڭگەگە يە بولدى.
«تابىلدى دوسىموۆتىڭ شىعارماشىلىعى تەرەڭ، بولەك، جانىما جاقىن. سوندىقتان شىعارمالارىن ورىنداپ ءجۇرمىن. بۇل جولى باس جۇلدە بۇيىردى. بارلىق قاتىسۋشى وتە جاقسى ورىنداپ شىقتى»،- دەدى ايگۇل قۇباش.
ءبىرىنشى ورىنعا تىگىلگەن 600 مىڭ تەڭگە اتىراۋ وبلىسىنان كەلگەن ونەرپاز التىنبەك باقتىكەرەيەۆكە بۇيىردى.
ەكىنشى ورىنعا (400 مىڭ تەڭگە) اسىلبەكوۆتەر وتباسىلىق دۋەتى (قىزىلوردا وبلىسى) لايىق دەپ تانىلدى.
ەكى ءۇشىنشى ورىندى (200 مىڭ تەڭگە) «ا-ۆ» دۋەتى (اقتوبە قالاسى) جانە ايبەك كاحوۆ (بقو) ءوزارا ءبولىستى.
ارنايى جۇلدەمەن (150 مىڭ تەڭگە) اقتوبەلىكتەر التىباي ساپارباي جانە قۋان جاڭبىرباي ماراپاتتالدى.
قالعان قاتىسۋشىلارعا ديپلوم جانە 100 مىڭ تەڭگەدەن ىنتالاندىرۋ سىيلىعى تابىستالدى.