بولاشاق كارتينانىڭ سيۋجەتى اقىننىڭ كەڭەستىك يدەولوگياعا قارسى شىعۋىنا نەگىزدەلگەن
الماتىدا «جامبىل. جاڭا ءداۋىر» ءفيلمىنىڭ ءتۇسىرىلىمى باستالدى. كارتينا ق ر مادەنيەت جانە سپورت مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ قولداۋىمەن شىعارىلادى، دەپ حابارلايدى Almaty-akshamy.kz Baq.kz-كە سىلتەمە جاساپ.
فيلم اقيىق اقىن جامبىل جابايەۆتىڭ تۋعانىنا 175 جىل تولۋىنا ورايلاستىرىلعان. ءتۇسىرىلىم توبىن رەجيسسەر جاندوس قۇسايىنوۆ باسقارادى. ونىڭ شىعارماشىلىق قورجىنىندا «ءالي» جانە «شابدالى» كوركەم فيلمدەرى، سونداي-اق «جاقسى ادام»، «كوكە» سەريالدارى بار.
بولاشاق كارتينانىڭ سيۋجەتى اقىننىڭ كەڭەستىك يدەولوگياعا قارسى شىعۋىنا نەگىزدەلگەن. فيلمدە جامبىلدىڭ ومىرىنە اسەر ەتكەن ايتۋلى وقيعالار قامتىلادى: اقىندار سلەتى، اقىن ولەڭدەرىنىڭ گازەت-جۋرنالداردا جاريالانۋى، يوسيف گيلماننىڭ ماسكەۋدەن كەلۋى، جابايەۆتىڭ وراز جاندوسوۆپەن، باۋىرجان مومىشۇلىمەن جانە ءداۋىردىڭ باسقا دا كورنەكتى قايراتكەرلەرىمەن كەزدەسۋى كورسەتىلەدى.
باستى ءرولدى قازاقستاننىڭ حالىق ءارتىسى دوسجان جانبوتايەۆ سومدايدى. سونداي-اق، فيلمگە ق ر حالىق ءارتىسى دوسحان جولجاقسىنوۆ، ق ر ەڭبەك سىڭىرگەن ارتىستەرى ەرىك جولجاقسىنوۆ پەن بەكبولات تىلەۋحان، قازاقستاننىڭ ەڭبەك سىڭىرگەن قايراتكەرى نۇركەن وتەۋلوۆ، اكتەرلەر اسەت يمانعالي، اسان ءماجيت، قاجىمۇقان قالىمبەت جانە ەرجان نۇرىمبەت قاتىسادى.
نەگىزگى لوكاسيالار – الماتى جانە الماتى وبلىسى. قويۋشى وپەراتورى ەركىنبەك پتىرالييەۆ («بوي اتبايا»، «جەلتايا كوشكا»). بيىل اۆتورلار 32 ءتۇسىرىلىم اۋىسىمىن جۇزەگە اسىرۋدى جوسپارلاپ وتىر. ءفيلمنىڭ نەگىزگى، سونىڭ ىشىندە اۋقىمدى كورىنىستەرى كەلەسى جىلى تۇسىرىلەدى.
كارتينانى تۇسىرۋمەن «مادەنيەت جانە شىعارماشىلىق باستامالاردى قولداۋ» قوعامدىق قورى اينالىسۋدا. اۆتورلار اتى اڭىزعا اينالعان جامبىل جابايەۆتىڭ ءومىرى مەن شىعارماشىلىعى تۋرالى بىرەگەي فيلم قازاقستاندىقتارعا عانا ەمەس، شەتەلدىك كورەرمەندەرگە دە قىزىقتى بولادى دەگەن ۇمىتتە.
ەستەرىڭىزگە سالا كەتەيىك، بۇل جامبىل تۋرالى العاشقى كوركەم فيلم ەمەس. 1952 جىلى رەجيسسەر ەفيم دزيگان «قازاقفيلم» ستۋدياسىندا باستى ءرولدى شاكەن كەنجەتاي ۇلى ايمانوۆ سومداعان «جامبىل» كارتيناسىن تۇسىرگەن.