سەرىك جۇمانعارين قازاقستاندا ءبىرىڭعاي ۋاقىت بەلدەۋىن ەنگىزۋ ماسەلەسى بويىنشا جۇمىس توبىنىڭ مۇشەلەرىمەن جانە ءوڭىر باسشىلارىمەن كەڭەس وتكىزدى
2024 جىلدىڭ 1 ناۋرىزىنان باستاپ قازاقستان رەسپۋبليكاسىنىڭ بۇكىل اۋماعىندا 5ء-شى ساعاتتىق بەلدەۋ (UTC +5) قولدانىلادى. مەديسينا، فيزيولوگيا، گەوگرافيا، مەترولوگيا سالالارىنىڭ ماماندارى بىلتىر جىل بويى قازاقستان اۋماعىندا قولايلى ۋاقىت بەلدەۋىن بەلگىلەۋ ماسەلەسىن زەرتتەپ، وسىنداي شەشىمگە كەلگەن.
جۇمىس توبىنىڭ مۇشەلەرى UTC +5 ءبىرىڭعاي ۋاقىت بەلدەۋى قازاقستاننىڭ كوپتەگەن ءوڭىرىنىڭ بارىنشا تابيعي ۋاقىتقا جاقىن ۋاقىتتى پايدالاناتىن ەڭ دۇرىس جانە وڭتايلى نۇسقا دەگەن كەلىسىمگە كەلدى.
دەسە دە ەلىمىزدىڭ جەكەلەگەن وڭىرلەرىندە، اتاپ ايتقاندا، شىعىس قازاقستان وبلىسىنىڭ تۇرعىندارى اراسىندا بۇل شەشىم كوپتەگەن سۇراق مەن تۇسىنبەۋشىلىك تۋدىردى. 23-24 قاڭتاردا جۇمىس توبىنىڭ مۇشەلەرى كەزەكتى رەت شقو-عا بارىپ، مەنوۆنوە اۋىلىنىڭ، سونداي-اق التاي، گلۋبوكوە جانە شەمونايحا اۋداندارىنىڭ تۇرعىندارىمەن كەزدەستى. ۇكىمەتتە وتكەن كەڭەستە سەرىك جۇمانعارينگە شقو-داعى ساپار قورىتىندىسى جانە الداعى ۋاقىتتا جاڭا ۋاقىت بەلدەۋىنە كوشەتىن باسقا وڭىرلەردەگى احۋال جونىندە باياندالدى.
شقو اكىمى اپپاراتىنىڭ باسشىسى ەربول نۇرعالييەۆ ءوڭىر تۇرعىندارىن تولعاندىراتىن نەگىزگى ماسەلەلەر جونىندە باياندادى. جاڭا ۋاقىتقا كوشكەندە ايماقتا تاڭنىڭ ەرتە اتۋى ساعات 03.15-تە، ال ەرتە باتۋى – ساعات 15.20-دا بولماق. بۇل ماسەلە بويىنشا ف.گ.فەسەنكوۆ اتىنداعى «استروفيزيكالىق ينستيتۋتى» ج ش س جۇلدىزدار مەن تۇماندىقتار فيزيكاسى زەرتحاناسىنىڭ مەڭگەرۋشىسى ليۋبوۆ شەستاكوۆا تۇسىنىكتەمە جاسادى.
«ەلدى مەكەندەردەگى جەرگىلىكتى ۋاقىت سول ايماقتاعى كۇننىڭ ماكسيمالدى بيىكتىگىمەن، ياعني ءتۇس مەزگىلىندەگى ساعات 12.00-گە سايكەستىگىمەن انىقتالادى. UTC+5 ورتالىق مەريديان – وسى مەريديانداعى UTC+5 تۇسكى ۋاقىت (شىعىس بويلىق 75°) ساعات 12.00-گە سايكەس كەلۋى كەرەك دەگەندى بىلدىرەدى. ۋاقىت بەلدەۋىنىڭ ەنى وسى ۋاقىتقا +/- جارتى ساعات بولۋى مۇمكىن. شقو ەكى ساعاتتىق بەلدەۋ شەكاراسىندا ورنالاسقان. وسكەمەندە UTC +5 بويىنشا ءتۇس مەزگىلى ساعات 11.30-دا بولادى، سوندىقتان قالا وسى ۋاقىت بەلدەۋىنە سايكەس كەلەدى. ال كۇننىڭ ەرتە باتۋى مەن تاڭنىڭ اتۋىنا قاتىستى ماسەلە – بۇل ەندى گەوگرافيالىق ەندىككە بايلانىستى. كۇننىڭ ۇزاقتىعى وڭتۇستىكتە يا بولماسا سولتۇستىكتە تۇرعانىمىزعا بايلانىستى. وڭتۇستىكتە جازداعى جانە قىستاعى كۇن ۇزاقتىعىنىڭ ايىرماشىلىعى شامالى. ال سولتۇستىكتە ەداۋىر كوپ. ءتىپتى اق تۇندەر بولادى. مىسالى، مۇنداي كەزدەردى شقو-دا 22 ماۋسىمدا بايقاۋعا بولادى»، — دەدى ساراپشى.
ءبىراق بۇل جاعدايلار ۋاقىت بەلدەۋىنە بايلانىستى ەمەس.
كەڭەس قورىتىندىسى بويىنشا ۆيسە-پرەمەر دەنساۋلىق ساقتاۋ مينيسترلىگىنە ساۋدا جانە ينتەگراسيا مينيسترلىگىمەن بىرلەسىپ، قىسقا مەرزىمدە شقو جانە باسقا وڭىرلەر ءۇشىن قازاقستاندا ءبىرىڭعاي ۋاقىت بەلدەۋىن ەنگىزۋدىڭ بارلىق نيۋانسى تۋرالى اقپارات قامتىلعان ادىستەمەلىك قۇرال ازىرلەۋدى، سونداي-اق قاجەت بولعان جاعدايدا، ەڭ وزەكتى ماسەلەلەردى ءتۇسىندىرۋ ءۇشىن وڭىرگە ماماندار مەن مەملەكەتتىك ورگاندار باسشىلارىنىڭ توبىن جىبەرۋدى تاپسىردى.