يممۋندىق جاسۋشالار اراسىندا وتە كۇشتىلەرى دە كەزدەسەدى
كەيبىر ادامداردىڭ يممۋندىق جۇيەسى COVID-19-عا وتە ءتوزىمدى، ءتىپتى ينفەكسيا وشاعىندا جۇرسە دە ۆيرۋستى جۇقتىرمايدى. عالىمدار مۇنى جاسۋشالىق يممۋنيتەتتىڭ كۇشتىلىگىمەن جانە ۆيرۋستى تۋعانىنان قابىلدامايتىن قابىلەتىمەن بايلانىستىرىپ وتىر، دەپ حابارلايدى Almaty-akshamy.kz.
ريا ءنوۆوستيدىڭ مالىمەتىنشە، قوزدىرعىش ادام اعزاسىنا تۇسكەندە ونى ت-ليمفوسيتتەرى قارسى الادى. ولاردىڭ مىندەتى - جۇقتىرعان جاسۋشالاردى تانىپ، ونى جويۋ، سونىمەن قاتار بوگدە انتيگەندەر تۋرالى ماعلۇماتتى انتيدەنە تۇزەتىن ۆ-جاسۋشالارىنا جەتكىزەدى. دەگەنمەن، العاشقى يممۋندىق جاسۋشالار اراسىندا وتە كۇشتىلەرى دە كەزدەسەدى ەكەن، ولار ماعلۇماتتى انتيدەنەگە جەتكىزبەستەن ۆيرۋستى وزدەرى-اق جويىپ جىبەرۋگە قاۋقارلى.
مۇنداي جاعدايدا ادامدا كلينيكالىق بەلگىلەر بايقالمايدى، انتيدەنە دە تۇزىلمەيدى، ال پتر تەستى تەرىس بولىپ شىعادى. ءبىراق، اعزا ەكىنشى رەت ۆيرۋس جۇقتىرماۋ ءۇشىن قورعانىس قابىلەتىنە يە بولادى. ويتكەنى، ت-ليمفوسيتتەردىڭ اراسىندا پاتوگەندى ەستە ساقتايتىن ارنايى ت-جاسۋشالارى بار. مۇنداي يممۋنيتەتتىڭ قانشالىقتى تۇراقتى ءارى ۇزاققا شىدايتىنى ءالى كۇنگە دەيىن تولىعىمەن انىقتالماعان.
COVID-19-دىڭ العاشقى تولقىنىندا عالىمدار لوندونداعى اۋليە ۆارفولومەي اۋرۋحاناسىندا قىزىل ايماقات جۇمىس ىستەپ جۇرگەن مەديسينا قىزمەتكەرلەرىنە ءتورت اي بويى باقىلاۋ جۇرگىزگەن. ولاردان قان تالداماسى مەن ۇنەمى پتر تەست الىپ وتىرعان. مەديسينا قىزمەتكەرلەرىنىڭ كوبى كوروناۆيرۋسپەن اۋىرعان، الايدا ۆيرۋستى جۇقتىرۋ تاۋەكەلىنىڭ جوعارى بولۋىنا قاراماستان 58 ادامدا نە اۋرۋ بەلگىسى، نە قانىندا انتيدەنە، تىپتەن ۆيرۋستى رنك دا بولماعان. دەگەنمەن ت-جاسۋشالى يممۋندىق جاۋابى مىقتى بولىپ شىعىپتى.
اۋىرماعانداردىڭ جيىرماسىندا ت-جاسۋشاسىنىڭ دەڭگەيى جوعارى بولسا، 19-دا IFI27 يممۋندىق جۇيەسىندەگى اقۋىز جوعارى بولعان. سونداي-اق 58 ادامدا «سەرونەگاتيۆتى» ت-جاسۋشا انىقتالعان. بۇل SARS-CoV-2 ۆيرۋسىن تانىپ، ونى جوياتىن اقۋىزدار كلاستەرى، ياعني كوروناۆيرۋستىڭ كۇش الماي تۇرىپ العاشقى كەزەڭىندە جويىپ جىبەرۋگە قاجەتتى اقۋىزدار.
عالىمداردىڭ ويىنشا، ۆيرۋس بۇل ادامداردىڭ اعزاسىنا ەنگەن، ءبىراق وندا تىرشىلىگىن جالعاستىرا الماعان. زەرتتەۋ پاندەميانىڭ العاشقى كەزەڭىندە بولعاندىقتان ادامداردىڭ جاسۋشالارىندا قورعانىس جادىسى بولماعان، الايدا ت-جاسۋشانىڭ مىقتى يممۋندىق جۇيەسى ولاردى قورعاي بىلگەن.