رەسەيگە جالعا بەرىلگەن پوليگوننىڭ ورنى مەملەكەتكە قايتارىلدى

32 قىستاقتىڭ 53 مىڭ 600 گەكتار جەرى زاڭداستىرىلىپ بەرىلدى

رەسەي قازاقستاننان جالعا العان اتىراۋ وبلىسىنداعى (قىزىلقوعا اۋدانىنداعى) جەرلەردىڭ نەگىزگى بولىگى مەملەكەتتىك قورعا قايتارىلاتىن بولدى. ءتيىستى زاڭ كۇشىنە ەندى دەپ حابارلايدى Almaty-akshamy.kz اقجايىق-قا سىلتەمە جاساپ.

كەزىندە رف قورعانىس مينيسترلىگى قىزىلقوعا اۋدانىنداعى 750 مىڭ گەكتاردى 25 جىلعا جالعا العان بولاتىن. ونداعى پوليگوندا جيىرمادان استام يادرولىق جارىلىس بولىپ، كەيىن ول جەرلەر ۇزاق ۋاقىتقا دەيىن پايدالانىلمادى. ق ر  پرەمەر ءمنينسترىنىڭ ورىنباسارى رومان سكليار وسى جەرلەرگە قاتىستى دەپۋتتاتاردىڭ ساۋالىنا بىلاي دەپ جاۋاپ بەرگەن ەدى: «2016 جىلعى 22 اقپاندا سىناق پوليگوندارىن پايدالانۋ جانە جالداۋ تۋرالى شارت راتيفيكاسيالاندى. شارت تۋرالى بۇرىن رەسەي فەدەراسياسى قورعانىس مينيسترلىگىنەن جالعا الىنعان № 929 «مەملەكەتتىك ۇشۋ سىناق ورتالىعى» پوليگونىنىڭ سولتۇستىك بولىگى قازاقستاننىڭ يۋريسديكسياسىنا ءوتتى. اتىراۋ وبلىسىنىڭ قىزىلقوعا اۋدانىندا رەسەيلىك اسكەريلەردىڭ جالىندا 749،6 مىڭ گەكتار جەر بولعان ەدى».

ونىڭ ايتۋىنشا 624،6 مىڭ گا (83،3 پايىز) جەر مەملەكەتتىك قورعا قايتارىلدى. جەر قايتارىلعاننان كەيىن ەكى جىل توپىراق پەن سۋعا زەرتتەۋلەر جۇرگىزىلىپ، ناتيجەسى بويىنشا ەكولوگيالىق ءقاۋىپسىز جانە اۋىل شارۋاشىلىعىنا جارامدى ەكەنى بەلگىلى بولدى.

«تايسويعاندا بۇرىننان پوليگون جەرىندە وتىرعان 32 قىستاقتىڭ 53 مىڭ 600 گەكتار جەرى زاڭداستىرىلىپ بەرىلدى. ولار شارۋا قوجالىقتارىن قۇرىپ، مال شارۋاشىلىعىن وركەندەتۋمەن تىكەلەي اينالىسىپ جاتىر. ال جۋىق ارادا 90 شارۋا قوجالىعىنا 118 900 گەكتار جەر پايدالانۋعا بەرىلدى»، - دەيدى قىزىلقوعا اۋدانى اكىمىنىڭ ورىنباسارى جانىبەك تۇرداعالييەۆ.