تابيعي اۋماقتاردا وت جاققان دەمالۋشىلارعا ايىپپۇل سالىنباق

تابيعاتتى قورعاۋ ايماقتارىندا وت جاققان ءتارتىپ بۇزۋشىلارعا 306 مىڭ تەڭگە كولەمىندە ايىپپۇل سالىنۋى مۇمكىن.

بۇل تۋرالى بريفينگ بارىسىندا الماتى قالالىق توتەنشە جاعدايلار دەپارتامەنتىنىڭ باستىعى رۋسلان قاسىمبايەۆ ءمالىم ەتتى، دەپ حابارلايدى Almaty-akshamy.kz Egemen.kz-كە سىلتەمە جاساپ. 

«ەرەكشە قورعالاتىن تابيعي اۋماقتاردا جانە بەلگىلەنبەگەن جەردە وت جاققانى ءۇشىن ورمان شارۋاشىلىعى مەكەمەلەرىنىڭ قىزمەتكەرلەرى «اكىمشىلىك قۇقىق بۇزۋشىلىق تۋرالى» كودەكستىڭ 367-بابى بويىنشا اكىمشىلىك ايىپپۇل سالۋعا ۋاكىلەتتى ەكەنىن اتاپ وتكىم كەلەدى، جەكە تۇلعالارعا سالىناتىن ايىپپۇل سوماسى - 10-نان 100 اەك-كە دەيىن، ال بۇل 30 630 تەڭگەدەن 306 300 تەڭگەگە دەيىن»، - دەدى رۋسلان قاسىمبايەۆ.

سپيكەردىڭ سوزىنشە، توتەنشە جاعدايلار دەپارتامەنتى، پوليسيا باسقارماسى مەن ىلە الاتاۋ پاركىنىڭ قىزمەتكەرلەرى 95 رەيد جۇرگىزگەن. ناتيجەسىندە 45 ءورتتىڭ الدىن الىپ، 45 ءتارتىپ بۇزۋشىنى اكىمشىلىك جاۋاپقا تارتتى.

الماتى قالاسى توتەنشە جاعدايلار دەپارتامەنتىنىڭ باسشىسى قالا تۇرعىندارى مەن قوناقتارىنا تاۋلى ورمان القابىنداعى ءورت قاۋىپسىزدىگى ەرەجەلەرىن ەسكە سالدى.

«ءبىرىنشى كەزەكتە ءورت شىعۋى مۇمكىن قوقىستاردى شىعارۋ قاجەت. سونداي-اق قاتاڭ بەلگىلەنگەن ورىنداردان تىس جانىپ تۇرعان سىرىڭكە، تەمەكى قالدىعىن لاقتىرۋعا، قۇرعاق شوپتەردى جاعۋعا، وت جاعۋعا جانە باربەكيۋ قۇرالدارىن پايدالانۋعا تىيىم سالىنادى»، -  دەدى ول.

دەمالۋشىلارعا اقپارات، ىلە الاتاۋى ۇلتتىق ساياباعىندا ىستىق تاماق پىسىرۋگە ارنالعان ارنايى جابدىقتالعان 14 ورىن (ورىندىق، ۇستەل، وت جاعۋعا ارنالعان بەتوندالعان الاڭ، باربەكيۋ)، الما-اراسان شاتقالىنىڭ اۋماعىندا 12 ورىن بار. ۇلكەن الماتى، كازاچكا وزەندەرىندە جانە بۋتاكوۆكادا 2 ورىن بەلگىلەنگەن.