بۇگىن قازاقستان حالىق جازۋشىسى، قازاق كسر مەملەكەتتىك سىيلىعىنىڭ لاۋرەاتى تۇمانباي مولداعالييەۆتىڭ تۋعانىنا 90 جىل تولدى، دەپ حابارلايدى aqshamnews.kz
تۇمانباي مولداعالييەۆ 1935 جىلى 20 ناۋرىزدا الماتى وبلىسى، ەڭبەكشىقازاق اۋدانى، «جارسۋ» سوۆحوزىندا تۋعان. 2011 جىلى 10 قازاندا دۇنيەدەن وزدى.
ول جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن بىتىرگەن. ءوزىنىڭ شىعارماشىلىق ەڭبەك جولىن «لەنينشىل جاس» گازەتى مەن «پيونەر» جۋرنالىنان باستادى. 1959-1970 جىلدار ارالىعىندا «پيونەر» جۋرنالىندا قىزمەت اتقاردى. 1970-1973 جىلدار ارالىعىندا «بالدىرعان» جۋرنالىنىڭ جاۋاپتى حاتشىسى بولدى. 1973 جىلدان «جازۋشى» باسپاسى جانىنداعى بالالار جانە جاستار ادەبيەتىنىڭ باس رەداكسياسى مەن «جالىن» جۋرنالىنىڭ باس رەداكتورى بولىپ قىزمەت ىستەدى.
العاشقى ولەڭدەر جيناعى «ستۋدەنت داپتەرى» 1957 جىلى جارىق كوردى. ت. مولداعالييەۆ نازىك سىرلى، ويلى دا وتتى جىرلارمەن تانىلدى. «كاميلا» (1960)، «كوكتەم تاڭى» (1961) ، «الاتاۋ قىزى» (1963)، «فەريۋزا تۋرالى جىر» (1964)، «زۋلايدى كۇندەر» (1965)، «جۇرەگىم مەنىڭ ساپاردا» (1966)، ت. ب. جيناقتارى شىقتى. 1967 جىلى جارىق كورگەن «جاڭا داپتەر» اتتى كىتابى ءۇشىن 1968 جىلى قازاقستان كومسومولى سىيلىعىنىڭ لاۋرەاتى اتاندى. «ەسكەرتكىش» (1969)، «شاقىرادى جاز مەنى» (1970)، «جۇرەك وياۋ قاشاندا» (1972) اتتى كىتاپتارى دا وقۋشىلاردىڭ ءىلتيپاتىنا بولەندى. ونىڭ «قوش، كوكتەم» اتتى تاڭدامالى ولەڭدەر كىتابى (1971)، «حاتتار» اتتى پوەمالار جيناعى (1974) جارىق كوردى. ت.مولداعالييەۆتىڭ ورىس تىلىندە «يا - سىن سەميرەچيا» (1962)، «پەرۆايا ۆسترەچا» (1968)، «نوۆايا تەتراد» (1969) اتتى ولەڭ جيناقتارى شىققان.
تۇمانباي مولداعالييەۆتىڭ جالپى 500 ولەڭىنە اندەر جازىلعان. ونىڭ «قۇستار قايتىپ بارادى» (مۋزىكاسى ن. تىلەندييەۆتىكى)، «باقىت قۇشاعىندا»، «ءانىم سەن ەدىڭ» (مۋزىكاسى ش.قالداياقوۆتىكى)، «ەرتىس ءۆالسى» (مۋزىكاسى ب. جاماقايەۆتىكى)، «شاقىرادى كوكتەم» (مۋز. ءا.بەيسەۋوۆتىكى) اتتى انگە جازىلعان ولەڭدەرى حالىق اراسىنا كەڭ تاراعان. ول بايرون، م. لەرمونتوۆ، ت. شيەۆچەنكو، و.تۋمانيان، س.كاپۋتيكيان، ع. عۇلام، ر. عامزاتوۆ جانە باسقا دا اقىنداردىڭ شىعارمالارىن قازاق تىلىنە اۋداردى.
اقىننىڭ 1990 جىلى 13 تومدىق شىعارمالار جيناعى، 2004 جىلى 14 تومدىق شىعارمالار جيناعى جارىق كوردى.
1992 جىلى فيزۋلي اتىنداعى حالىقارالىق تۇركى دۇنيەسى اقىندارى سىيلىعى تاپسىرىلدى.