«ەگەمەن قازاقستان» گازەتىندە جاريالانعان پرەزيدەنت قاسىم-جومارت توقايەۆتىڭ سۇحباتى قوعام ومىرىندە ۇلكەن سىلكىنىس تۋعىزدى. مەملەكەت باسشىسىنىڭ تۇجىرىمدارىن ەلىمىز دامۋىنىڭ الداعى جىلدارعا ارنالعان ستراتەگيالىق باعدارلاماسى دەپ قابىلداساق تا بولادى.
سۇحبات تاۋەلسىز ەلىمىزدىڭ مۇددەسى قورعالعان، بولاشاعى باتىل ايقىندالعان باعدارلاردى، قوعامدىق سانادا قالىپتاسقان بۇگىنگى وزەكتى ماسەلەلەردى قامتۋىمەن قۇندى بولىپ وتىر. پرەزيدەنت تۇجىرىمدارى حالىق كوڭىلىنەن شىققان سىندارلى ويلار مەن تىڭ يدەيالارعا تولى.
قازاقستان حالىقارالىق قاۋىمداستىقتىڭ ىرگەلى، بەلسەندى قاتىسۋشىسى رەتىندە شارتاراپتاعى ۇدەرىستەن قالا المايتىنى انىق. سوندىقتان الدىمىزدا مەملەكەتىمىزدىڭ سىندارلى، بەيبىت جانە وركەنيەت جولىمەن ورلەۋىن قامتاماسىز ەتۋدىڭ ابىرويلى پارىزى تۇرعانى بەلگىلى. پرەزيدەنت سۇحباتى قازىرگىدەي قيىن كەزەڭدە، جان-جاقتان ەلىمىزگە ارانداتۋشىلىق اقپاراتتىق شابۋىل ۇدەپ تۇرعان تۇستا ءاربىر قازاقستاندىقتىڭ ساناسىنا سەرپىندى سىلكىنىس الىپ كەلدى.
قازاققا وتكەننەن ساباق الاتىن وكىنىشتى وقيعالاردى قايتالاماۋعا ۇيرەتەتىندەي، الداعى ۋاقىتتاردا تەك جەڭىسكە جەتەلەيتىندەي تىلسىم كۇش كەرەك. ول كۇشتى پرەزيدەنت سۇحباتىنان الۋعا بولادى. ەلدە قاسىرەتتى قاڭتار وقيعاسى تۋرالى كۇدىكپەن قاتار كۇمان بار دا ءبىزدىڭ كوڭىلىمىز تىنىش بولماسى انىق. پرەزيدەنت ول تۋرالى سىننان وتكىزىلگەن اقپاراتتارعا ابدەن كوزىن جەتكىزىپ، العاشقى رەت اشىق ايتۋى كوپ جاعدايدان حابار بەرەدى. سول ارقىلى وتكەن بيلىك گۆاردياسىنا دا، ءوزىن وپپوزيسيالىق توپ سانايتىندارعا دا تاعى ءبىر ويلانۋعا مۇمكىندىك بەرىپ وتىر. راس، ۇلت رەتىندە، حالىق رەتىندە، جاقسى، جامان بولسىن، ءبىزدىڭ بۇدان باسقا وتانىمىز جوق ەكەنىن دە ايتىپ وتىرۋى كوپتى ويلانتۋى ءتيىس. شىندىق، اقيقات قوعامدى ساۋىقتىرادى، ونى سەرگىتىپ، وڭى مەن سولىن دۇرىس تانۋعا جول باستايدى. بۇل جەردە سانا جاڭعىرۋى ءتيىس. سۋبەكتيۆتى فاكتور رەتىندە شىنايى ايتىلعان ءسوز حالىقتىڭ بىرلىگىن نىعايتاتىنى بيلىك پەن حالىقتىڭ ءوزارا گارمونياسىنا ءپوزيتيۆتى ىقپالىن تيگىزەتىنى انىق. مۇندايدا وتىرىكتىڭ ءورىسى تار. ال «تۋعان حالقىمىز عوي، سوندىقتان ماقتاي بەرەيىك» دەگەن كوزقاراس ورگە باساتىن ەلدىڭ قابىلدايتىن ۇستانىمى بولماۋى ءتيىس. پرەزيدەنت ءوز سۇحباتىندا وسى مادەنيەتتى ادەمى جەتكىزە بىلگەن.
نەگاتيۆتى زارلاپ ايتا بەرۋ قولدارىنان تۇك كەلمەيتىن، ءوزىن ازامات، ۇلت ادامى رەتىندە سەزىنبەيتىندەرگە ياعني، قۇلدارعا عانا ءتان. نەگاتيۆ – رۋحتى تۇنشىقتىرۋشى فاكتور. الاش ارداقتىسى مۇستافا شوقاي: «جامان حالىق دەگەن جوق، جامان ادامدار بار، ادامگەرشىلىگى مول مەملەكەت دەگەن بولمايدى، ادامگەرشىلىگى مول ادامدار بولادى» دەپ ايتقانداي، پرەزيدەنت مەملەكەتتى قورعايتىن، ونىڭ ار-نامىسىن كوزدىڭ قاراشىعىنداي ساقتايتىن ۇلتتىق كادرلاردى قالىپتاستىرۋدى اماناتتاپ وتىر. جاس كادرلاردىڭ ناعىز ءومىر مەكتەبى، بىلىكتىلىككە توسەلۋى قىزمەت بارىسىندا، ۇجىمداعى، اينالاسىنداعى ارىپتەستەرىمەن وي-قاقتىعىسى كەزىندە شىڭدالاتىنى ايقىن.
مەملەكەت باسشىسى ەلىمىزدىڭ ءادىل جانە باسەكەلى ەكونوميكا جۇيەسىن قۇرۋ، ەكونوميكانى ءارتاراپتاندىرۋ جانە مونوپوليادان ارىلۋ، ينفراقۇرىلىمدى جاڭعىرتۋ، ينۆەستيسيا تارتۋ جۇمىستارىمەن اينالىسۋ قاجەتتىگىن ەسكەرۋى ەل دامۋىنىڭ ىلگەرى باسۋىنا باستايتىن شارا. قابىلدانىپ جاتقان شارالار بويىنشا ارداگەرلەر قاۋىمى اراسىندا كونسەنسۋس بار. ءبىز الماتى قالالىق ارداگەرلەر كەڭەسى پرەزيدەنتتىڭ سۇحباتتا ايتىلعان باستامالارىنا بارىنشا قولداۋ بىلدىرەمىز.
جالپى، پرەزيدەنتتىڭ سۇحباتىندا وسى جانە باسقا دا ماڭىزدى ماسەلەلەر جان-جاقتى تالقىلانعان. وندا قوعامدى الاڭداتقان كوپتەگەن ساۋالدارعا ناقتى جاۋاپ بەرىلگەن. سۇحبات دامۋدىڭ قازىرگى كەزەڭىندە مەملەكەتىمىزدىڭ الدىندا تۇرعان نەگىزگى مىندەتتەردى بەلگىلەپ بەرۋىمەن دە قۇندى.